Դերասան, «Շարմ» ընկերության տնօրեն Հրանտ Թոխատյանը, ում Մաշտոցի պուրակի պահապանները սպասում են մի քանի օր շարունակ, այսօր էլ չի կարողացել մասնակցել քաղաքապետարանի մոտ կազմակերպված ակցիային և այցելել այգի՝ կապված ժամանակի սղության հետ: Սակայն «Առաջին լրատվական»-ի հետ զրույցում Հրանտ Թոխատյանը նշեց, որ այն, որ կա նման ակտիվություն, միմիայն ողջունելի է, քանի որ մարդիկ փորձում են արդարության համար պայքարել: «Փորձում են պայքարել իրենց քաղաքի համար, իսկ որ ամենակարևորն է՝ կանաչ տարածքների համար»,- ասաց Հրանտ Թոխատյանը:
Բացի այդ, ճանաչելով Տարոն Մարգարյանին և տեսնելով՝ ինչպես է նա աշխատել որպես Ավան համայնքի թաղապետ, Թոխատյանն ասաց. «Ես չեմ կարծում, որ նա այն մարդն է, որ պետք է ոչնչացնի կանաչ տարածքները»:
«Մեկ ընդհանուր լուծում պետք է փորձել գտնել, ոչ թե ամեն մեկը իրենը փորձի առաջ տանել, այլ մեկը մյուսին հասկանալով, մի փոքր փոխզիջման գնալով պետք է գտնել մեկ ճիշտ տարբերակ»,- ավելացրեց Հրանտ Թոխատյանը:
Լուսանկարը՝ Bravo.am-ի
