«Առաջին լրատվական»-ի տեղեկություններով, այն բանից հետո, երբ անցած տարվա վերջին Կարեն Բաբայանը, որն առավել հայտնի է Շերիֆ մականունով, նշանակվեց «Զվարթնոց» օդանավակայանի անվտանգության ծառայության պետ, այս կառույցը հայտնվել է ոստիկանության հատուկ ուշադրության կենտրոնում:
Կարեն Բաբայանը ՀՀ ոստիկանապետ Վովա Գասպարյանի նախկին կադրերից է և երկար տարիներ աշխատել է վերջինիս ենթակայությամբ` ռազմական ոստիկանությունում: Հետագայում Կարեն Բաբայանը ռազմական ոստիկանությունից դուրս եկավ, իսկ որոշ ժամանակ անց հայտնվեց ոստիկանության համակարգում: Մինչև Վովա Գասպարյանի ՀՀ ոստիկանապետ նշանակվելը Կարեն Բաբայանը զբաղեցնում էր ՀՀ ոստիկանության «Զվարթնոցի» գծային բաժնի պետի պաշտոնը:
Վովա Գասպարյանի ոստիկանապետ նշանակվելուց անմիջապես հետո Բաբայանը սեփական դիմումի համաձայն ոստիկանության համակարգից դուրս եկավ: Դեկտեմբերի վերջին հայտնի դարձավ, որ Կարեն Բաբայանը նշանակվել է «Զվարթնոցի» անվտանգության ծառայության պետ:
«Առաջին լրատվական»-ի տեղեկություններով՝ ոստիկանության գծային բաժնի աշխատակիցները խոչընդոտում են «Զվարթնոց» օդանավակայանի բնականոն գործունեությանը:
Այս հարցը պարզելու նպատակով դիմեցինք օդանավակայանի լրատվական ծառայություն, որի ղեկավար Գևորգ Աբրահամյանը մեզ հայտնեց, որ այդ հարցի շուրջ «Զվարթնոց»-ի իրավաբանները հայտարարություն են նախապատրաստում, և շուտով այն կհրապարակվի:
Միաժամանակ Գ.Աբրահամյանը նշեց, որ Քաղավիացիայի մասին օրենքի համաձայն՝ տարբեր կառույցների աշխատակիցները որոշակի հատվածներում ունեն մուտքի իրավունք, իսկ որոշ տարածքներում՝ չունեն, և դա կարգավորվում է «Հատուկ նշանակության օբյեկտների անցագրային ռեժիմով»: «Օդանավակայանի ղեկավարությունը ոչ մեկի հանդեպ որևէ նոր սահմանափակումներ չի կիրառել»,- նշեց Գ. Աբրահամյանը:
Ավելի ուշ «Արմենիա միջազգային օդանավակայաններ» ՓԲԸ լրատվական ծառայությունից «Առաջին լրատվական»-ին տրամադրել են օդանավակայանի հայտարարությունը, որում ասվում է. «ՀՀ Ոստիկանության «Հերթապահ մաս» հաղորդաշարի փետրվարի 19-ի կիրակնօրյա թողարկման մեջ տեղ գտած սյուժեում ավիացիոն անվտանգության մասին ոչ պատեհ առիթով արված մեկնաբանության վերաբերյալ հայտնում ենք մեր մտահոգությունը և տեղեկացնում.
ՀՀ Ավիացիայի մասին օրենքի 52-րդ հոդվածով և ՀՀ կառավարության թիվ 944 որոշմամբ, ՀՀ Ավիացիոն անվտանգության ազգային ծրագրով ավիացիոն անվտանգության գործառույթն իրականացվում է հատուկ կանոնադրական խնդիրներ իրականացնող Ավիացիոն անվտանգության ծառայության կողմից, որը գործում է օդանավակայանի կազմում, կոորդինացվում է ՀՀ ԱԱԾ-ի կողմից և առաջնորդվում Քաղաքացիական ավիացիայի միջազգային կազմակերպության (ICAO), ECAC ձեռնարկներով` նպատակ ունենալով ապահովել քաղաքացիական ավիացիայի պաշտպանությունն անօրինական միջամտության ակտերից:
Հարկ է նշել, որ ԱՄՕ Ավիացիոն անվտանգության ծառայության անձնակազմը, տեխնիկական միջոցները և ընթացակարգերը սերտիֆիկացված են միջազգային համապատասխան մարմինների կողմից (ICAO, ECAC): Ծառայության բարձր պատրաստվածությունն ու տեխնիկական ժամանակակից սարքավորումներով հագեցվածությունը ճանաչված են լավագույններից մեկը Եվրոպայում:
Հետևաբար, տեսանյութում արտահայտված կարծիքը ոչ կոմպետենտ է և կայացվել է ոչ համապատասխան մասնագիտական պատրաստվածություն ունեցող մարմնի կողմից»:
