Ըստ բեռնամաքսային հայտարարագրերի և քաղաքացիների կողմից կազմակերպված առևտրի տվյալների՝ 2010 թ. 2-րդ եռամսյակում պարենամթերքին բաժին է ընկել հանրապետություն ներմուծված ապրանքների 17.2%-ը (2009 թ. 2-րդ եռամսյակում` 18.0%), իսկ արտահանման ծավալներում` 12.2%-ը (2009 թ. 2-րդ եռամսյակում` 16.7%): Ինչպես հայտնի է, պարենամթերքի ներկրման բիզնեսում գերիշխող դիրք է զբաղեցնում գործարար, ԱԺ պատգամավոր Սամվել Ալեքսանյանը։ Այսպիսով, հաշվետու ժամանակաշրջանում պարենամթերքի արտաքին առևտրաշրջանառության ծավալն ընթացիկ գներով նախորդ տարվա նույն ժամանակաշրջանի համեմատ ավելացել է 19.6%-ով և կազմել 186.3 մլն ԱՄՆ դոլար, այդ թվում` պարենամթերքի ներմուծումը` 156.5 մլն ԱՄՆ դոլար (ՍԻՖ գներով) և արտահանումը` 29.8 մլն ԱՄՆ դոլար (ՖՕԲ գներով): 2010 թ. 2-րդ եռամսյակում նախորդ տարվա համապատասխան ժամանակաշրջանի համեմատ հիմնական պարենային ապրանքատեսակներից ալյուրի ներմուծման ծավալը նվազել է 11.4 անգամ և կազմել 0.1 հազ տոննա, կարագինը` 69.5%-ով և կազմել 0.1 հազ. տոննա, տավարի մսինը` 44.3%-ով և կազմել 1.8 հազ. տոննա, խոզի մսինը` 24.9%-ով և կազմել 1.1 հազ. տոննա, կաթինը` 21.6%-ով և կազմել 0.9 հազ. տոննա, բրնձինը` 12.4%-ով և կազմել է 2.4 հազ. տոննա, մակարոնեղենինը` 12.3%-ով և կազմել 0.8 հազ. տոննա: Փոխարենն ավելացել են շաքարի (25.6 անգամ), ձվի (2.8 անգամ), թռչնի մսի (2.5 անգամ), մրգի (56.3%-ով), ցորենի (49.6%-ով), պանրի (48.4%-ով), բանջարեղենի (26.8%-ով), բուսական յուղի (7.9%-ով) ներմուծման ծավալները: