Պետությունը գումար է դուրս գրել մանկատան շրջանավարտներին բնակարանով ապահովելու համար՝ որտե՞ղ են այդ գումարները: Այսօր ՄԻՊ գրասենյակում Մարդու իրավունքների պաշտպան Կարեն Անդրեասյանի ներկայությամբ տեղի ունեցած քննարկմանը նման հարցադրմամբ հանդես եկավ ԱԺ «Ժառանգություն» խմբակցության պատգամավոր Անահիտ Բախշյանը` խոսելով «Առանց ծնողական խնամքի մնացած երեխաներին բնակարաններով ապահովելու» թեմայի շրջանակներում:
Քննարկման մեկնարկին ՄԻՊ Կարեն Անդրեասյանն իր մտահոգությունն արտահայտեց մանկատան շրջանավարտների բնակարանային խնդրի վերաբերյալ: Նա նշեց, որ այս պահի դրությամբ նման խնդիր ունեն 310 շրջանավարտներ:
Ըստ ՄԻՊ գրասենյակի իրավաբանական հարցերի մասնագետ Աիդա Մուրադյանի՝ յուրաքանչյուր տարի մանկատներից բազմաթիվ երեխաներ են դուրս գալիս: «Սակայն պետական ծրագրով բնակարան ստանալու համար հաշվառված է եղել 500-ը»,- տեղեկացրեց Ա. Մուրադյանը` հավելելով, որ նրանք բոլորը չեն ստացել բնակարան:
Ա. Բախշյանը անդրադառնալով 2008թ.-ից հետո պետական բյուջեով նախատեսված բնակապահովման ծրագրերին՝ հայտնեց, որ դրանք չեն իրականացել: «Պետությունն այդ նպատակի համար միայն մլրդ երկու հարյուր տասներկու միլիոն դրամ է դուրս գրել, իսկ ծրագիրը կատարվել է միայն 20%-ով: Սրանք Վերահսկիչ պալատի հաշվետվությունների մեջ ամրագրված թվերն են: Երբ լիազորված մարմնին հարցնում ես՝ ինչ պետք է արվի, չկա որևէ հստակ պատասխան: Դա մի լավ կերակրաման է եղել մի շարք մարդկանց համար»,- կարծիք հայտնեց պատգամավորը` խոսելով մի քանի շրջանավարտների մասին, ովքեր բավականին հասուն տարիքում դեռ բնակարան չունեն:
Քննարկմանը ներկա
ՀՕՖ ներկայացուցիչն ասաց, որ պետք է հնարավորությունների սահմանում լուծումներ առաջարկել, սակայն ըստ Անահիտ Բախշյանի՝ ավելի լավ լուծում, քան պետական բյուջեի կողմից գումարների տրամադրումն է՝ չկա:
Մանկատան երեխաների բնակապահովման խնդրի վերաբերյալ քննարկմանը սոցապ փոխնախարար Ֆիլարետ Բերիկյանն ասաց, որ այդ ծրագրերն այս պահին չեն իրականացվում: «Մենք շատ ենք բանավիճել այս թեմայի շուրջ, առաջարկել ենք շահագրգիռ կողմերի հետ քննարկումներ անցկացնել, իսկ այսօր հարցին քաղաքական աստառ ենք տալիս»,- նշեց Ֆիլարետ Բերիկյանը: Անահիտ Բախշյանի այն հարցադրումներին, թե ինչու այս կամ այն շրջանավարտը հաշվառված չի եղել բնակարան ստանալու համար, պատասխանեց՝ ծրագիրն այլևս չի գործում:
