2010 թ. դեկտեմբերի վերջին դրամի կուրսը դոլարի նկատմամբ չարժեզրվեց` ի տարբերություն 2009 թ. դեկտեմբերի վերջի: Եթե 2009 թ. դեկտեմբերի սկզբին 1 դոլարը փոխարկվում էր մոտ 385 դրամով, ապա դեկտեմբերի վերջին այն փոխարկվում էր 377-378 դրամով: Իսկ 2010 թ. դեկտեմբերի սկզբին եթե 1 դոլարի միջին փոխարժեքը 359 դրամ էր, ապա դեկտեմբերի 30-ին այն հասավ 363.4 դրամի: 2009 թ. փոխարժեքի կուրսի փոփոխությունը ամենայն հավանականությամբ պայմանավորված էր արտաքին պարտքի մեծացման հաշվին մեծ ծավալի արտարժութային ներհոսքով: Այն, ըստ էության, այնքան էական էր, որ գերազանցեց ու ճնշեց դեկտեմբերի վերջին պարգևավճարների տեսքով (հիմնականում քաղծառայողների) շրջանառություն մտնող դրամի ծավալը: Ողջ 2010 թ. ընթացքում դրամը թեև քիչ, սակայն արժևորվեց, այն պարագայում, երբ առաձնին վերցրած դեկտեմբեր ամսին այն մի փոքր արժեզրկվեց: Տարվա կտրվածքով արժևորումը, ըստ էության, պայմանավորված էր նախ և առաջ մասնավոր տրանսֆերտների աճով, և ապա նոր արտաքին վարկերով (2010 թ. ավելի քան 2 անգամ քիչ վարկեր վերցվեցին, քան 2009-ին էր): Սակայն մասնագետները նշում են, որ ինչպես այս տարի` 2011թ., այնպես էլ առաջիկա մի քանի տարիներին դրամի արժևորումը քիչ հավանական է, եթե անգամ արտերկրյա մասնավոր տրանսֆերտները էականորեն աճեն: Բանն այն է, որ արտաքին պետական պարտքի սպասարկումը առաջիկայում հասնելու է բավականին լուրջ չափերի` ընդհուպ մինչև տարեկան 450 մլն ԱՄՆ դոլարի, ինչը արտարժույթի լրացուցիչ պահանջարկ է ստեղծում երկրի ներսում:
