Մտավորականները լավության դիմաց իշխանություններին են ծառայում (տեսանյութ)

Այսօր վաղ առավոտից Մաշտոցի պողոտային կից այգում էին հավաքվել պուրակի պահպանման համար մտահոգ քաղաքացիները, ակտիվիստները, իսկ շուրջ երկու տասնյակ ոստիկաններ հսկում էին, որ նրանք շինարարական տարածք չմտնեն: Մինչ ակտիվիստները պահանջում էին դադարեցնել շինարարությունը, հերթական շինարարական մեքենան հայտնվեց, և ոստիկանները փորձում էին ակտիվիստներին համոզել չխանգարել շինարարական աշխատանքներին:
«Յուրաքանչյուրը իշխանության որոշման դեմ իրավունք ունի արտահայտելու, խնդիրը նրանում չէ՝ Տարոն Մարգարյանը գալո՞ւ է հանդիպելու մարդկանց հետ, թե՞ ոչ: Վաղ թե ուշ իշխանությունները պետք է հասկանան, որ այս ընդվզումը կարող է վտանգ ստեղծել, երբ տեղի կունենա՝ դժվար է ասել, բայց մինչև այդ օրը՝ անհրաժեշտ է գալ այստեղ, պայքարել, ցուցաբերել հասարակական անհանդուրժողականություն»,- «Առաջին լրատվականի» հետ զրույցում ասաց քաղաքագետ Անդրեաս Ղուկասյանը:
Նրան խնդրեցինք մեկնաբանել որոշ մտավորականների՝ մասնավորապես Արա Երնջակյանի երեկվա արտահայտությունները: «Իրենց տեսակետից ազնիվ է այդ դիրքը, որովհետև եթե այդ մարդիկ իշխանությունից ստանում են ինչ-որ բարիքներ, ապա և հավատարիմ պիտի լինեն իշխանությանը: Այդ իմաստով տրամաբանական է, որ նման մտավորականները քաղաքային իշխանությունների կողքին են կանգնած ու համարում են, որ այս այգին վերացնելն ու առևտրի կենտրոն դարձնելը ճիշտ որոշում է: Եթե հիշենք, թե ինչպես էին ձայնագրվում Սերժ Սարգսյանի գովազդային հոլովակները, ու նկարահանվող մտավորականներն իրականում ինչ էին ասում և արդյունքում ինչ պիտի տեսներ քաղաքացին… Այդ՝ երկու կյանքով ապրելը՝ ներքին խոհանցում մի բան ասելը, իսկ հրապարակային մյուս բան ասելը, մեր մտավորականության որոշ հատվածի հատկությունն է: Նրանք ֆինանսական, նյութական կախման մեջ են իշխանություններից և լավության դիմաց պետք է համապատասխանաբար ազնիվ ծառայեն»,- պատասխանեց Ա. Ղուկասյանը: