РИА Новости-ի փոխանցմամբ՝ Թաիլանդում Իրանի դեսպան Մաջիդ Բիզմարկը տեղական Nation թերթին տված հարցազրույցում հայտարարել է, որ Բանգկոկի պայթյուններն իրականացրել է սիոնիստական ռեժիմը (Իսրայել)՝ դրանով իսկ վնասելու համար Իրանի իմիջին և սեպ խրելու իրանա-թաիլանդական հարաբերությունների մեջ.
«Եթե Թաիլանդի պայթյուններին խոր և իմաստուն մոտեցում ցուցաբերենք, ապա կպարզենք, թե ով է կանգնած այդ սցենարի հետևում: Կան բաներ, որոնց մասին ես չեմ կարող հայտարարել: Սակայն կրկնում եմ, որ այդ սցենարում առաջին կասկածյալները սիոնիստներն են: Իրանը կտրականապես դատապարտում է պայթյուններ իրականացրած անձանց:
Մենք խորապես կասկածում ենք, որ թաիլանդական ու մալայզիական իշխանությունների կողմից ձերբակալված կասկածյալները հիրավի Իրանի քաղաքացիներ են, չնայած այն հավաստիացումներին, որ այդ անձինք Թաիլանդ են ժամանել իրանական անձնագրերով:
Վերջին մի քանի ամիսներին նմանատիպ միջադեպեր գրանցվում են համայն աշխարհում: Դրանք բոլորն էլ պատրաստվում և իրականացվում են սիոնիստական ռեժիմի տարրերի կողմից՝ աշխարհում իրավիճակն ապակայունացնելու նպատակով: Սիոնիստներն այդ կամպանիան սկսել են մի քանի ամիս առաջ՝ համաշխարհային ԶԼՄ-ների համար պատրաստելով նենգափոխած լուրեր»:
Հիշեցնենք, որ փետրվարի 14-ին Բանգկոկում՝ դեսպանատների թաղամասի մոտ, տեղի ունեցան 3 պայթյուններ, որոնց հետևանքով վիրավորվեցին 4 տեղաբնակ և մեկ օտարազգի (ենթադրվում է, որ նա ունի իրանական ծագում):