ՄԱԿ-ի տվյալներով ` Աֆղանստանում ափիոնի բերքը 2011 թ. աճել է 61 տոկոսով: Կազմակերպության տվյալներով` թմրամիջոցի արտահանումը երկրին բերում է տարեկան 2.4 մլրդ դոլարի եկամուտ, ինչը երկրի ՀՆԱ-ի 15 տոկոսն է կազմում:
2011 թ. աֆղանական դաշտերում ցանվել է 131 հա կակաչի սերմ, ինչը 7 տոկոսով ավելի է նախորդ տարվանից: 2011 թ. հավաքվել է 61 տոկոսով ավելի բերք, քան 2010 թ., երբ հավաքվել էր 5.8 հազար տոննա:
«Մենք չենք կարող խոսել հավասարաչափ զարգացման մասին, երբ ափիոնի արտադրությունը երկրի տնտեսական ակտիվության միակ կենսունակ ճյուղն է»,- հայտարարել է ՄԱԿ-ի գլխավոր քարտուղար Պան Գի Մունը Վիեննայում, որտեղ ընթանում է աֆղանական թմրամիջոցների անօրինական շրջանառության դեմ պայքարի Փարիզյան պակտի մասնակիցների մասնակցությամբ համաժողովը: Նա կոչ է արել միջազգային հանրությանը օգնել Աֆղանստանին թմրամիջոցների դեմ պայքարելու նպատակով:
Պան Գի Մունն ընդգծել է, որ Աֆղանստանի կառավարությունն իր հերթին պետք է ուշադրություն դարձնի խնդիրների վրա՝ նշելով, որ երկրի ազգային իրավապահ մարմինները պետք է հավելյալ ջանքեր գործադրեն ափիոնի հումք հանդիսացող կակաչի ոչնչացման ու այն ցանելը արգելելու համար: Նա կարևորել է թմրամիջոցների պատրաստման լաբորատորիաների վերացումը:
Ներկայում Աֆղանստանին է բաժին ընկնում ափիոնի համաշխարհային արտադրության 90 տոկոսը, ինչը համարվում է հերոինի պատրաստման հիմնական հումքը:
Ափիոնը ահաբեկչական «Թալիբան» շարժման եկամուտների հիմնական աղբյուրն է, որն իր գործունեությունը գլխավորապես ծավալում է Աֆղանստանում և Պակիստանում:
Մեկ ամիս առաջ հաղորդվում էր, որ 2011 թ. տվյալներով, աֆղանական ափիոնի գինը թանկացել է 133 տոկոսով:
