ԵՄ քաղաքականությունն արևելյան ուղղությամբ բավականին լուրջ փոփոխության է ենթարկվում, և յուրաքանչյուր երկրի նկատմամբ առանձին մոտեցում է ցուցաբերվելու: Ինչպես այսօր լրագրողների հետ հանդիպման ժամանակ հայտնեց ՀՅԴ պատգամավոր Արա Նռանյանը՝ Փարիզում, Ստրասբուրգում և Բեռլինում այդ երկրների գործադիր իշխանությունների և ԱԳ նախարարությունների հետ հանդիպումների ընթացքում արձանագրել է, որ նախկինում եվրաինտեգրման գործընթացներում տարածաշրջանի երկրները հավասար էին դիտարկվում, բայց այժմ, երբ ՀՀ առաջընթացի համար բավականին լավ պայմաններ են ստեղծվել, դա այլևս չի պայմանավորվելու Ադրբեջանի առաջընթացով:
Նրա խոսքով՝ եվրոպական մեծ թվով բարձրաստիճան պաշտոնյաներ հայտարարեցին, որ շարունակելու են ճնշումները Թուրքիայի վրա՝ մինչև այն փոխվի և դառնա ԵՄ չափանիշներին համապատասխան երկիր:
Արևելյան գործընկերության համակարգող պաշտոնյան Ադրբեջանի ներկայացուցչի` Ֆրանսիայի Սենատում Հայոց ցեղասպանության ժխտումը քրեականացնող օրինագծի վերաբերյալ բողոքին պատասխանել է, որ Սենատում դա իրավական հարց է, և զիջումներ չեն լինի:
«Ղարաբաղի կարգավորման կամ թուրքական խնդրում ԵՄ կողմից ճնշում չկա: ԵՄ-ի կարծիքով՝ ՀՀ թիվ մեկ խնդիրը ժողովրդավարության հաստատումն է և նորմալ ընտրությունների անցկացումը: Սա վերաբերում է թե՛ իշխանություններին, թե՛ ընդդիմությանը՝ սադրանքներ չեն ընդունվելու»,- ասաց Ա. Նռանյանը:
