Երևանի Կենտրոն և Նորք-Մարաշ վարչական շրջանների ընդհանուր իրավասության դատարանում այսօր շարունակվել է «Եհովայի վկաներ» քրիստոնեական կրոնական կազմակերպության պատիվն ու արժանապատվությունն արատավորող տեղեկությունների հերքումը տարածելուն, պատասխանը հրապարակելուն և փոխհատուցում վճարելուն պարտավորեցնելու գործով դատական նիստն ընդդեմ Հանրային հեռուստատեսության, սակայն Արթուր Մարտիրոսյանի խոսքով` այդ ընթացքում կողմերի հաշտության հետ կապված որևէ հայտարարություն չի արվել:
Մարտիրոսյանն ընգծեց նաև, որ այսօրվա դատական նիստը հետաձգվել է հենց Հանրային հեռուստատեսության գրավոր միջնորդությամբ. «Ոչ մենք ենք ներկա եղել նիստին, ոչ էլ իրենք»,- նշեց կրոնական կազմակերպության փաստաբանը:
Բանն այն է, որ այսօրվա դատավարության վերաբերյալ հրապարակում է եղել համաձայն որի` նիստին հայցվորի փաստաբան Արթուր Մարտիրոսյանը դատարանին ներկայացրել է նիստը հետաձգելու մասին միջնորդություն, քանի որ կողմերը ցանկանում են հաշտության գալ: Սակայն Մարտիրոսյանը «Առաջին լրատվական»-ի հետ զրույցում նշեց, որ ինքն այս պահին անգամ չի կարող ասել՝ այս գործը հաշտությամբ ավարտվելու հավանականություն ունի՞, թե՞ ոչ, իսկ կողմերի միջև եղած բանավոր պայմանավորվածությունները փաստաբանը չցանկացավ հրապարակել:
Հիշեցնենք, որ հայցվոր կողմը վիճարկում է 2010 թ. նոյեմբերի 9-ին, 10-ին և 11-ին «Հայլուր» և «Տեսանկյուն» հաղորդաշարերի ընթացքում հնչած տեղեկությունն այն մասին, որ Սևանում իր ծնողների սպանության մեջ մեղադրվող Արման Թորոսյանը Եհովայի վկա է:
Այս գործով նախորդ դատական նիստի ընթացքում կողմերը ներկայացրել էին իրենց տեսակետները, թե որոնք են դիտում որպես զրպարտություն և վիրավորանք պարունակող արտահայտություններ: Հայցվորի ներկայացուցիչ Ելենա Մարգարյանը ընդգծել էր մի քանի այսպիսի արտահայտություններ. «Ընդամենը երեկ Եհովայի վկան սպանեց իր ծնողներին», «Ինչպե՞ս փրկել արյան ծարավ Աստծո զոհերին», «Եհովայի կամազուրկ ստրուկներ և դաժան դահիճներ» խորագիրը և «Ինչո՞ւ են ուրիշ աստվածները և սուտ մարգարեները կարողանում տիրանալ մարդկանց հոգիներին՝ դարձնելով նրանց կամազուրկ ստրուկ ու դաժան դահիճներ» և այլն:
