«Եվրատեսիլ-2012»-ին Հայաստանը կմասնակցի՞, թե» չի մասնակցի հարցադրումը, մեծ հաշվով, այսօր էլ մնում է օդից կախված, քանի որ շատ հավանական է՝ փետրվարի 18-ին որոշեն և անգամ հնչեցնեն մասնակցի անունը, բայց գա օրը, և շատ բան փոխվի. արդյունքում Հայաստանն այդպես էլ չմասնակցի, և մեր երգիչներն էլ չկարողանան «թասիբ» պահել, իսկ ոմանք էլ իրենց մանկությունն անցած քաղաքում չկարողանան երգել և տեսնել դասընկերներին: Ինչևէ, դեռ սպասել է պետք: Իսկ մինչ այդ, Youtube-ում հայտնվել է «Սա մեր աշխարհն է» երգը, որ «Դորիանս» խումբն առաջարկում է «Եվրատեսիլ-2012»-ին:
Վահագն Գևորգյան, «Դորիանս» խմբի պրոդյուսեր
– Վահագն, «Դորիանսը» հանդիսատեսի դատին հանձնեց եվրատեսիլյան իր տեսահոլովակը: Արձագանքները բավականին բուռն են, բայց միևնույն ժամանակ խոսակցություններ կան, որ «Եվրատեսիլին», այնուամենայնիվ, Հայաստանը չի մասնակցի: Արդյոք որևէ տեղեկատվությո՞ւն ունեք, և չե՞ք ափսոսա, որ այսքան նախապատրաստվեցիք:
– Ոչ, տեղեկություններ չունեմ և չեմ ափսոսում, քանի որ ինչ կա ափսոսալու. այդ երգը ապրեց, և ափսոսալու ոչինչ չկա:
– Գոռ Սուջյանն ասում է, որ սա թասիբի հարց է, և եթե Ադրբեջանում չլիներ, «Դորիանսը» չէր մասնակցի «Եվրատեսիլ-2012»-ին:
– Այնպես չէ, որ միայն թասիբի հարց է, ու մենք միայն դրա համար որոշեցինք: Պատասխանատվությունը մեծ է, և մենք բոլորս դա հասկանում ենք, մենք տվեցինք մեր տարբերակը և ցանկության դեպքում մենք պատրաստ ենք այն կատարել «Եվրատեսիլ-2012»-ում:
– Եվրոպայի հեռարձակողների միությունը մասնակից երկների անվտանգության հարցը չի լուծելու: Արդյոք այս տեսակետից մտավախություն չկա՞:
– Ես կարծում եմ, որ եթե մեր երկիրը չմասնակցի, կապված կլինի հենց դրա հետ: Եթե որոշում կայացվի, որ Հայաստանը չի մասնակցում, կարծում եմ, որ դրա պատճառը կլինի երաշխիքների բացակայությունը:
– Գիտեմ, որ «Դորիանս» խմբի նկատմամբ համակրանք ունեն նաև մեր պաշտոնյաները, մասնավորապես մշակույթի նախարար Հասմիկ Պողոսյանը ցանկանում է, որ Դուք ներկայացնեք Հայաստանը Եվրատեսիլ-2012-ում: Ինչպե՞ս եք կարողացել գերել նրան:
– Կարծում եմ` երաժշտությամբ:
– Վահագն , իսկապե՞ս խումբը իր առջև թասիբի հարց է դրել գնալ ու մասնակցել «Եվրատեսիլին» Բաքվում:
– Ինձ համար թասիբի հարց է, եթե Հայաստանը որոշի մասնակցել «Եվրատեսիլ- 2012», խմբի անդամների և իմ մտերիմների ցանկությունն է, որ գոնե մեկ անգամ որակյալ և արժեքավոր որևէ երգով ներկայանա: Այ դա թասիբի հարց է: Եթե նորից պետք է անենք այն, ինչ մինչև հիմա արել ենք, անիմաստ է:
Լուսանկարը` Bravo.am-ի
– Այսինքն՝ մինչև հիմա այն, ինչ արվել էր, անհաջո՞ղ էր և ոչ պրոֆեսիոնա՞լ:
– Ես չասացի ոչ պրոֆեսիոնալ են ներկայացել, ես ասացի որակի մասին, դրանք մինչև հիմա անորակ են և ինձ համար որևէ արժեք չեն ներկայացնում, և դա պայմանավորված է նրանով, որ ինչ-որ մեկը որոշել է, որ «Եվրատեսիլի» ֆորմատը հենց դա է: Ես գիտեմ, որ «Եվրատեսիլը» ոչ մի ֆորմատ չունի և ցանկացած մարդ կարող է ներկայացնել այն, ինչ համարում է արժեքավոր և որակյալ:
– Ներկայացրե՞լ եք երգը «Եվրատեսիլի» հայաստանյան պատվիրակության ղեկավարներին, Ալեքսան Հարությունյանը արդյոք տեսակետ հայտնե՞լ է:
– Ես չգիտեմ, տեղյակ չեն: Բնականաբար լսած կլինեն, բայց որևէ կարծիք կամ որևէ խոսակցություն որևէ մեկը չի զանգել, չի հայտնել: Վերջիվերջո իրենք են պատասխանատու:
– Հասարակության արձագանքը տեսահոլովակից հետո ինչպե՞ս էր. հենց այնպես, ինչպես ակնկալո՞ւմ էիք, թե՞ ընդհակառակը:
– Ավելին էր, քան ես ակնկալում էի: Դրա ապացույցը Յութուբի դիտումների քանակն է և մեկնաբանությունները, որոնք կան, դրանց քանակը և բովանդակությունը:
– Իսկ մինչև այս տարի, նախորդ տարիներին մտածե՞լ էիք, որ խումբը պետք է մասնակցի «Եվարտեսիլին»: Ամեն դեպքում Բաքո՞ւն ստիպեց մասնակցել:
– Քանի որ բոլորս էլ գիտակցում ենք, որ Բաքվում մասնակցելը բավական պատասխանատու է և դժվար, այդ պատճառով մենք հայտնեցինք մեր պատրաստակամությունը` մասնակցելու և ներկայացնելու Հայաստանը, եթե դա մեզ հաջողվի, և ընտրեցինք երգի մեր տարբերակը: Սկզբում ասում էին՝ միայն թե չստիպեն «Դորիանսին» ուրիշ երգ երգել, և կարող եմ ասել, որ ոչ ոք «Դորիանսին» չի կարող ստիպել երգել այն, ինչ «Դորիանսը» չի հավանում:
– Մասնավորապես մամուլում շրջանառվում էր Թաթա Սիմոնյանի անունը և ասվում էր, եթե նա ներկայանա «Եվրատեսիլին», շատ ադրբեջանցիների դուր կգա, արդյոք հավանական համարում եք այս տարբերակը: Եվ արդյոք կարելի՞ է «Եվրատեսիլին» այդ տեսակ ներկայանալ:
– Մեզ մոտ ամեն ինչն էլ հավանական է: Իսկ թե ինչքանով եմ դա համարում ճիշտ… իմ համոզմամբ, ես կարծում եմ` Թաթան դրան չի գնա, բայց իհարկե չեմ կարող դա հաստատ ասել: Բայց եթե մեզ դա է պետք, ուրեմն դա է պետք: «Դորիանսը» չի մտել մրցավազքի մեջ և չի փորձում որևէ մեկից առաջ ընկնել կամ ինչ-որ մեկին խանգարել: Այն ամենը, ինչ մենք արել ենք, մենք գրել ենք երգ, ձայնագրել ենք և տվել ենք ձեզ, հիմա երգը կհամարվի՞ որ արժանի է ներկայացնելու, թե՞ չի համարվի, դա արդեն թող որոշեն: Մենք պատրաստ ենք դրանով:
Գոռ Սուջյան, «Դորիանս» խմբի մենակատար
– Գոռ, Դուք օրերս հեռուստատեսությամբ մի միտք հնչեցրիք, որ «Եվրատեսիլ-2012»-ին Հայաստանի մասնակցությունը ավելի շատ թասիբի հարց է: Թասիբն ուր, ռոքն ուր. ինչպե՞ս եք համադրում այդ երկուսը:
– Եթե այդպես դիտարկենք, մարդիկ տարբեր են, մարդն ուր, թասիբն ուր: Ռոքը մարդու հետ կապ չունի… Ճիշտն ասած չհասկացա՝ ինչ ի նկատի ունեք:
– Ուզում եմ չակերտները բացեք, թե «թասիբ» ասելով՝ ի՞նչ եք ի նկատի ունեցել:
– Այդ պահին ես ուղղակի հոմանիշ բառ չգտա, որ ասեմ, թե չէ թասիբը ռոքի հետ մեծ կապ ունի, մենք գնում ենք մեր երկիրը ներկայացնենք, եթե գնում ենք, այդ ամենը թասիբի հարց է:
– Հատկապես Ադրբեջանում ներկայացնե՞լն է թասիբի հարց, թե՞ ընդհանրապես:
– Թասիբը իհարկե վերաբերում է Ադրբեջանին: Շատ եմ լսել, որ ասում են՝ չարժե գնալ, վախենում են, կամ թշնամու բեմում չարժե ելույթ ունենալ: Շատ արտահայտություններ եմ լսել՝ իմ տղան ծառայում է դիրքերում, իսկ դուք գնում եք թշնամու բեմում ելույթ ունենալու: Մեզ դավաճան են հանում, և մի քիչ շատ կոպիտ է ինձ համար: Պետք է ազգը միաբանվի, որոշում կայացնի, մենք խնդիր ունենք միավորվելու:
– Գոռ, սակայն մեր երկրում, երբ մի շարք խնդիրներ են առաջանում, որպես քաղաքացի չե՞ք ունենում արդյոք թասիբի զգացում: Օրինակ, երբ հայ–թուրքական արձանագրություն է ստորագրվում, երբ անխնա բնությունն է ոչնչացվում, արդյոք չի՞ առաջանում Ձեր՝ քաղաքացու թասիբը:
– Ես քաղաքականության մեջ ընդհանրապես չեմ ուզում խառնվել, որովհետև քաղաքականությունը ինձնից շատ հեռու բան է: Ես երաժիշտ եմ, քաղաքացի, ու քաղաքականության հետ ընդհանրապես կապ չեմ ուզում ունենալ և ընդհանրապես բիզնես հասկացության հետ չեմ ուզում կապ ունենալ:
– Իսկ քաղաքացիական դիրքորոշո՞ւմ` այս կամ այն հարցի շուրջ:
– Այսօր շատ ավելի մեծ խնդիրներ կան մարդկային արժեքների կորստի հետ կապված, սա ինձ համար ավելի թասիբի հարց է, և որ երաժշտությամբ մարդկանց մեջ առաջացնեմ էմոցիաները, որոնք կորչում են այսօր, և իմ մեջ թասիբ է արթնանում, որ մարդկանց մեջ արթնացնեմ այդ արժեքները: Դա ինձ համար թասիբի հարց է:
– Իսկ ինչո՞ւ են կորչում մարդկային էմոցիաները, ամեն մարդկայինը….
– Որովհետև ամեն ինչ գնում է դեպի կործանում, բնությունից հեռանում է ամեն ինչ, մարդիկ էլ դառնում եմ iphon վկա, մարդը պետք է բնությունից չանջատվի: Մի հետաքրքիր ֆիլմ կա՝ Baraka, թող բոլորը նայեն, ֆիլմում ոչ մի բառ չի ասվում, բայց որ նայեք, ամեն ինչ կհասկանաք: Աստծու ստեղծածից ճիշտը չկա:
– Նախաձեռությունները, որոնք հենց բնապահպանությանն են ուղղված, ողջունո՞ւմ եք:
– Իհարկե, եթե դա բիզնեսի տեսանկյունից չնայենք: Այսօր մարդու համար պետքական շատ ակցիաներ են արվում, շատ բաներ էլ կեղծ են արվում: Իսկ ես կեղծին այնքան վատ եմ վերաբերվում: Ինչ որ անում ես, պետք է անկեղծ անես և առանց շահերի:
