Համաշխարհային տնտեսությունում առկա ռիսկերը ստիպում են, որ վատատեսական սցենարները նույնպես դրվեն ՀՀ-ում սպասվող զարգացումների կանխատեսումների հիմքում: «Դրամավարկային քաղաքականության 2012 թ. ծրագրում» Կենտրոնական բանկը նվազեցրել էր այս տարի սպասվող տնտեսական աճի կանխատեսումները, հրապարակելով 3.1-4.8% ցուցանիշ:
«Առաջին լրատվական»-ի հետ զրույցում 1994-1998 թթ. ԿԲ նախագահ, տնտեսագետ Բագրատ Ասատրյանը նշեց, որ ԿԲ-ի այդ հրապարակումը ոչինչ էլ չի տալու, և դեռ վաղուց էր պետք վերանայել տնտեսական աճի տեմպերը, քանի որ դրանք շատ բարձր էին:
«Ինչքան իրատեսական լինեն կանխատեսումները, այնքան ճիշտ ու հավասարաակշռված վճիռներ կայացնելու հավանականությունն ավելի մեծ կլինի: Այս իմաստով դրական է»,- նշեց Բ.Ասատրյանը:
Անդրադառնալով դոլարիզացիայի կանխատեսվող նվազմանը՝ Բ. Ասատրյանը նշեց, որ ինչքան ռիսկայնությունը տնտեսության մեջ աճում է, այնքան դրան համարժեք դոլարիզացիայի մակարդակն է աճելու: «Այս տարի, կապված և տնտեսական աճի սպասվող տեմպերի անկման և մի շարք այլ գործոնների հետ, այդ թվում ներքին տնտեսական, ֆինանսական տիպի անկայնության խնդիրների հետ, դոլարիզացիայի մակարդակը բարձրանալու է»,- ասաց Բ. Ասատրյանը՝ հավելելով, որ կա իրական դոլարայնացում և ԿԲ համար տեսանելի ցուցանիշների տեսանկյունից դոլարայնացում. իրականն այն է, ինչ ստվերն է ընդգրկում, իսկ ստվերը 80%-ով դոլարային է:
