Ընդգրկելով Վ. Օսկանյանին` ԲՀԿ-ն ֆինանսատնտեսական միավորումից կդառնա կուսակցական: Այսօր «Առաջին լրատվական»-ի հետ զրույցում նման տեսակետ հայտնեց սոցիոլոգ Գևորգ Պողոսյանը`պատասխանելով, այն հարցին, թե Վարդան Օսկանյանի մուտքը ԲՀԿ, կարո՞ղ է ավելացնել այդ կուսակցության կշիռը:
Ըստ նրա` այս կուսակցության կշիռը Վ. Օսկանյանով չի պայմանավորվի: Գ. Պողոսյանի համոզմամբ` ԲՀԿ-ն, որպես կուսակցություն կշահի Վ. Օսկանյանի անդամակցությամբ, որովհետև միշտ ֆինանսատնտեսական միավորում է եղել: «Ավելի շատ կուսակցականություն կհաղորդի, բայց չեմ կարծում, որ առանձնապես կուսակցության կշիռը կբարձրանա: ԲՀԿ-ի կշիռն ինքնին ցածր չէ, իսկ Ծառուկյանի կշիռը բավական բարձր է: Ըստ հարցումների տվյալների, որոնք մենք ունենք, Ծառուկյանի՝ որպես անձի, ոչ որպես կուսակցապետի, վարկանիշը բավական բարձր է: ԲՀԿ-ն, որպես ՀՀԿ-ից հետո երկրորդ կուսակցություն, միշտ բարձր է եղել»,- մեկնաբանեց սոցիոլոգը`հավելելով, որ ընդգրկելով միջազգային շփումների փորձ ունեցող մարդկանց՝ ԲՀԿ-ն ավելի շատ դառնում է կուսակցություն:
Նա նաև նշեց, թե այն հանգամանքը, որ «Մարտիմեկյան» դեպքերի շուրջ շրջանառվում է նաև Վ. Օսկանյանի անունը՝ չեն անդրադառնա կուսակցության կշռի վրա, որովհետև, ըստ Գ. Պողոսյանի, «Մարտիմեկյան» դեպքերը ավելի շատ այլ գործիչների անունների հետ են շրջանառվել, քան Վ. Օսկանյանի:
Հիշեցնենք, որ երեկ Վ. Օսկանյանը դիմում էր ներկայացրել ԲՀԿ-ին անդամագրվելու համար:
