Իրանական Press TV հեռուստաալիքի փոխանցմամբ՝ Թեհրանը, ի պատասխան ԵՄ-ի կողմից իր նավթի ներկրման վրա սահմանած բեռնարգելքի, դադարեցրել է եվրոպական 6 երկրների նավթի մատակարարումը: Այսօր այդ մասին իրազեկվել են ԱԳՆ կանչված Ֆրանսիայի, Իտալիայի, Իսպանիայի, Հունաստանի, Պորտուգալիայի և Նիդերլանդների դեսպանները:
Նշվում է, որ Եվրոպայում իրանական նավթի ներկրման 68 տոկոսը բաժին է ընկնում Հունաստանին, Իտալիային և Իսպանիային: Հունաստանում նավթի սպառման 35 տոկոսը բաժին է ընկնում իրանական նավթին:
Բրիտանական Financial Times թերթի տվյալներով՝ եվրոպական վերոնշյալ 6 երկրները, միջին հաշվարկով, Իրանից օրական գնում են 600,000 բարել նավթ:
Հիշեցնենք, որ ԵՄ-ը իրանական նավթի ներկրման վրա բեռնարգելք է սահմանել հունվարի 23-ին. արգելքն ամբողջովին ուժի մեջ է մտնելու հուլիսի 1-ից: Մինչ այդ եվրոպական երկրները, որտեղ ներկայումս ուժեղ ցրտեր են, պետք է գտնեն նավթի մատակարարման այլընտրանքային աղբյուրներ:
