Գալիք ընտրություններին լրատվամիջոցների աշխատանքի շնորհիվ կբացահայտվեն դաղալությունները: Այսօր լրագրողների հետ հանդիպման ժամանակ ասաց «Ազգ» օրաթերթի գլխավոր խմբագիր
Հակոբ Ավետիքյանը` խոսելով գալիք ընտրություններին լրագրողների դերի և ԱԺ-ում նրանց ներգրավվածության հարցերի մասին:
Նա նշեց, որ վերջին համայնքային ընտրություններին ունեցանք այն վիճակի մանրակերտը, որը խոստանում է կրկնվել առաջիկա ընտրություններում: Ըստ նրա` այս ընտրությունները կտարբերվեն մյուսներից լրատվամիջոցների աշխատանքով և թափանցիկությամբ:
«Հիմա ընթերցողը դարձել է խմբագիր և լրագրող, շատ դժվար կլինի որևէ ծածկադմփոց անելը, վերահսկողությունը ընտրությունների մանրամասներին և դաղալություններին կլինի մեծ, շատ ավելի բացահայտ: Նկատի ունենալով ինտերնետային լրատվամիջոցների դաշտը, որը խճողված է, դժվար կլինի նաև կողմնորոշվել լրատվամիջոց ընտրելու հարցում»,- նշեց Հ. Ավետիքյանը` հավելելով, որ ընթերցողը դժվարություն կունենա ճիշտը սխալից տարբերելու գործում:
Անդրադառնալով լրագրողների՝ ԱԺ-ում ներգրավվածությանը՝ նա ասաց, որ շատ նորմալ է ընդունում այն, որ լրագրողները հավակնում են լինել ԱԺ-ում և իրենց դերը կատարել: Բանախոսը վերհիշեց, որ առաջին գումարման Գերագույն խորհրդի կազմում ներգրավված էին տասից ավելի լրագրողներ և գրողներ:
«Նրանք շատ օգտակար դեր կատարեցին. Հրանտ Մաթևոսյան, Այդին Մորիկյան, Արամայիս Սահակյան և այլն: Դա ճիշտ էր բազմակողմանիորեն զարգացած լինելու առումով»,- նկատեց Հ. Ավետիքյանը:
