Associated Press-ի փոխանցմամբ՝ Իսրայելի փոխվարչապետ Սիլվան Շալոմը ՄԱԿ-ի գլխավոր քարտուղար Պան Գի Մունի հետ հանդիպումից հետո լրագրողների հետ զրույցում հայտարարել է, որ Իրանի բոլոր գործողություններն ուղղված են միջուկային զենքին տիրապետող գերտերություն դառնալուն.
«Այդ նպատակով Թեհրանը մտադիր է իրեն ձեռնտու տարբերակով իշխանափոխություն իրականացնել մերձավորարևելյան երկրներում և իր վերահսկողության տակ առնել նրանց ածխաջրածինների հիմնական հանքավայրերը:
Իրանի ղեկավարությունը հույս ունի վերականգնել Պարսկական (Աքեմենյան) կայսրությունը, որը մեր թվարկությունից առաջ 6-րդ դարում ընդգրկում էր Հնդկաստանից ու Միջին Ասիայից մինչև ժամանակակից Թուրքիայի տարածքը և Լիբանան: Եթե Իրանի տրամադրության տակ հայտնվեն նավթի հանքավայրերն ու միջուկային ռումբ, ապա նա վստահ է, որ նորից կվերածվի աշխարհի գերտերություններից մեկին:
Այդպիսի հարևանը չի կարող չանհանգստացնել Իսրայելին: Իրանի միջուկային ծրագրի վերաբերյալ ԱԷՄԳ-ի զեկույցում առկա են միայն սպառնալիքներ: Դրա հետ մեկտեղ Իրանն աջակցում է հակաիսրայելական զինյալներին և ընդլայնում է իր հրթիռային զինանոցը, որը կարող է ուղղվել Իսրայելի դեմ: Ինչպե՞ս մենք կարող ենք երկխոսել այն կառավարության հետ, որի նախարարների կեսն ակնհայտորեն ցանկանում է մեր ոչնչացումը»:
Վերջում Շալոմն ընդգծել է, որ «Արաբական գարնան» արդյունքում Թունիսում, Եգիպտոսում ու Լիբիայում իշխանության եկած նոր ուժերն առավել թշնամաբար են տրամադրված, քան՝ նրանց նախորդները: