Եգիպտոսի պետական ԶԼՄ-ները հոդվածներ են հրապարակել, որոնցում բացահայտորեն մեղադրում են ԱՄՆ-ին երկրում անարխիա տարածելու մեջ,- հաղորդում է Reuters-ը: Նման հոդվածների համար գլխավորապես աղբյուր են հանդիսացել տարբեր բարձրաստիճան անձանց կողմից մեկնաբանությունները՝ կապված ոչ կառավարական կազմակերպությունների անդամների ձերբակալությունների ֆոնին Վաշինգտոնի և Կահիրեի միջև հարաբերությունների ճգնաժամի հետ:
«Անարխիայի ետևում կանգնած է Ամերիկան»,- գրում է «Al-Gumhuriya օրաթերթը: «Ամերիկան հովանավորում է անարխիայի տարածումը»,- հաղորդում է մեկ այլ թերթ՝ Al-Ahram-ը: Նման սյուժեներ է ցուցադրել նաև МЕNА պետական հեռուստաալիքը:
Նյութերում փաստեր են բերվում, որոնց համաձայն՝ ԱՄՆ-ը ակտիվորեն ֆինանսավորում է Եգիպտոսի տարածքում տարբեր ոչ կառավարական կազմակերպությունների: Դրա հիմնական նպատակն է Մուբարաքի հրաժարականից հետո ստեղծել «ԱՄՆ-ի և Իսրայելի համար շահավետ» քաղաքական իրավիճակ: «Գոյություն ունեցող բոլոր տվյալները ցույց են տալիս, որ հստակ ցանկություն կար թույլ չտալ Եգիպտոսի հնարավոր զարգացումը՝ որպես ուժեղ տնտեսությամբ ժողովրդավարական հանրապետություն»,- մեջբերվում են Եգիպտոսի միջազգային համագործակցության նախարար Ֆաիզա Աբդուլ Նագիի խոսքերը:
Հիշեցնենք. ոչ կառավարական կազմակերպությունների հետ կոնֆլիկտ առաջացավ այս տարվա հունվարին երկրում ժողովրդավարության տարածման հարցերով զբաղվող մի շարք հաստատությունների գրասենյակների խուզարկումից հետո: Դրան հետևեցին ձերբակալություններ, իսկ այդ կազմակերպությունների 44 անդամների դեմ հարուցվեցին քրեական գործեր: Պատճառն այն էր, որ այդ կազմակերպությունները ֆինանսավորվում են դրսից, ինչը հակասում է տեղի օրենքին: Հարկ է նշել, որ ձերբակալվածների մեջ կան 19 ԱՄՆ-ի և շուրջ երկու տասնյակ եվրոպական երկրների քաղաքացիներ:
Իր հերթին, ԱՄՆ-ը պահանջում է ազատ արձակել իր քաղաքացիներին և ապահովել նրանց անվտանգությունը Եգիպտոսի տարածքում: Բացի այդ, Պենտագոնը սպառնում է դադարեցնել Եգիպտոսի պետական ֆինանսավորումը: Մասնավորապես նշվում է, որ Եգիպտոսը կարող է զրկվել ավելի վաղ խոստացված 1.5 մլրդ դոլար ֆինանսական օգնությունից:
