Համացանցում տարածվել է տեսանյութ, որում դատավարություն է բեմադրված երկրի վարչապետ, նախագահական ընտրությունների թեկնածու Վլադիմիր Պուտինի դեմ:
Տեսանյութում ցուցադրվում է՝ իբր Մոսկվայի Խամովնիչեսկի դատարանում Պուտինի դեմ հարուցված քրեական գործով դատավարության հեռարձակումը: Մասնավորապես՝ կառավարության ղեկավարը մեղադրվում է «առանձնակի խոշոր չափերի պետական գույք գողանալու», ֆինանսական խարդախությունների, ինչպես նաև պաշտոնական լիազորությունների չարաշահման մեջ:
Նիստը վարում է դատավոր Վիկտոր Դանիլկինը, որը դատել է Միխայիլ Խոդորկովսկուն և Պլատոն Լեբեդևին: Ինքը՝ Պուտինը, տեսանյութում գտնվում է ճաղերի ետևում:
Ըստ սյուժեի՝ դատարանը կարծում է, որ «Պուտինը մասնակցություն է ունեցել ահաբեկչության նախապատրաստմանը, որի նպատակն էր վախեցնել բնակչությանը և ազդել գործող իշխանության մարմինների վրա»:
Վերջում լսվում է «Պուտինի» ձայնը: Դատավորը հարցնում է մեղադրյալի անունը, ազգանունը և հայրանունը, որին ճաղերի ետևից տղամարդը պատասխանում է. «Պուտին Վլադիմիր Վլադիմիրովիչ»: Իր ազգությունը տեսանյութի հերոսը նշում է Ռուսաստանի Դաշնություն:
Տեսանյութը տեղադրվել է YouTube վիդեոհոսթինգում, օգտատիրոջ անունը հայտնի չէ: