Ռուսաստանը մտադիր է դադարեցնել աշխատանքները Դամասկոսի իր դեսպանատանն առընթեր դպրոցում: Ինչպես հաղորդում է ИТАР-ТАСС-ը, այս մասին հայտնել է ՌԴ ԱԳՆ տեղեկատվության և տպագրության դեպարտամենտի փոխտնօրեն Մարիա Զախարովան:
«Մոտ ժամանակներս Սիրիայում Ռուսաստանի դեսպանատանն առընթեր միջնակարգ հանրակրթական դպրոցում աշխատանքը ժամանակավորապես կդադարեցվի։ Այս որոշումը թելադրված է առաջին հերթին երեխաների ապահովությամբ: Սա արտասահմանում բոլոր ռուսական հաստատությունների գլխավոր և անվիճելի առաջնահերթությունն է»,- ասել է նա:
«Միևնույն ժամանակ Դամասկոսում Ռուսաստանի դեսպանատունը, ինչպես նաև Հալեպում` հյուպատոսարանը, շարունակում են գործել պետական ռեժիմով` ողջ ծավալով լուծելով իրենց առջև դրված քաղաքական-դիվանագիտական խնդիրները` մեր երկրի և ժողովուրդների միջև ավանդական բարեկամական հարաբերությունների զարգացման համար»,- ասել է Զախարովան։
