ՀՀ վերաքննիչ քրեական դատարանում՝ դատավոր Եվա Դարբինյանի նախագահությամբ, վաղը ժամը 11.30-ին կհապարակվի դատավոր Արման Թովմասյանի նկատմամբ քրեական գործ հարուցելու վերաբերյալ Սամվել Հարությունյանի բողոքի քննության արդյունքում կայացված որոշումը:
Գործի քննությանն այսօր դատարան չէր ներկայացել դատախազության ներկայացուցիչը, իսկ դիմող Սամվել Հարությունյանն այսօր առավոտվանից բողոքի ցույցի էր դուրս եկել ՀՀ նախագահի նստավայրի առջև:
Հիշեցնենք, որ նախկինում Ստեփանավանի առաջին ատյանի դատավոր, իսկ այժմ վարչական դատարանի դատավոր Արման Թովմասյանի և Ստեփանավանի բժշկական կենտրոնի ֆինանսական աուդիտոր Աշոտ Հարությունյանի միջև կենցաղային խոսակցությունից ծագած վեճի հետևանքով հայաստանյան 2 տարբեր դատարաններում այս պահին զուգահեռաբար 2 գործեր են քննվում:
Իսկ վերաքննիչ ատյանում Աշոտ Հարությունյանի հայրը` Սամվել Հարությունյանը փորձում է քրեական գործ հարուցել 2010 թ. նոյեմբերին դատարանի տարածքում չորս կարգադրիչների հետ իր որդուն ծեծի ենթարկած դատավորի նկատմամբ, քանի որ այս պահին դատավորի փոխարեն, իր որդին է մեղադրվում դատավորի նկատմամբ ոտնձգություն կատարելու համար:
Հիշեցնենք, որ դատավորի և քաղաքացու միջև տեղի ունեցած ծեծկռտուքի անմիջապես հաջորդ օրը առավոտյան ոստիկանները ձերբակալել, այնուհետ կալանավորել էին Աշոտ Հարությունյանին, որից հետո նա չորս ամիս կալանքի տակ էր անցկացրել: Աշոտ Հարությունյանի նկատմամբ հարուցվել էր քրեական գործ` սկզբում քր.օր.-ի 316 հոդվածով (Իշխանության ներկայացուցչին խոչընդոտել իր գործողությունները կատարել), հետո փոխել էին խուլիգանության հոդվածով, թե հայհոյել է և այլն:
