Ռուսաստանի արտգործնախարար Սերգեյ Լավրովը հայտարարել է, որ Սիրիա խաղաղապահներ մտցնել հնարավոր է միայն որոշակի պայմանների դեպքում: Ինչպես հաղորդում է RIA-Novosti-ն, ըստ Լավրովի՝ նախ դրա համար անհրաժեշտ է հրավեր ստանալ Դամասկոսից, երկրորդ՝ դադարեցնել բռնությունը: Այսպիսի հայտարարությամբ Լավրովը հանդես է եկել՝ մեկնաբանելով երեկ Կահիրեում ԱՊԼ նիստի ժամանակ կայացրած այն որոշումը, որ անհրաժեշտ է Սիրիա ուղարկել ՄԱԿ-ի խաղաղապահների:
«Խաղաղապահական առաքելություն իրականացնելու համար անհրաժեշտ է ընդունող կողմի համաձայնությունը: Խաղաղապահական առաքելությունը, կամ ինչպես այդ առաքելությունն անվանում են ՄԱԿ-ի լեզվով՝ խաղաղություն պահպանելու առաքելությունը, նախ պետք է ունենա խաղաղություն, որը պետք է պահպանվի: Այլ խոսքերով՝ պահանջվում է համաձայնության գալ կրակը դադարեցնելու վերաբերյալ»,- իր դիրքորոշումն է բացատրել Լավրովը:
Դեռ նախքան Լավրովի այս հայտարարությունը՝ պաշտոնական Դամասկոսը կտրականապես մերժել էր ԱՊԼ առաքելությունը՝ դա համարելով միջամտություն երկրի ներքին գործերին: Ընդ որում՝ Սիրիայի պաշտոնական անձինք ակնարկել էին, որ խաղաղապահներ հրավիրելու մասին խոսք անգամ չի կարող լինել:
Սիրիայում տիրող ճգնաժամը լուծելու հերթական փորձը կարվի փետրվարի 13-ին. ՄԱԿ-ի ԱԽ-ն թեմային կանդրադառնա Նյու Յորքում:
Բացի այդ, փետրվարի վերջին նախատեսվում է «Սիրիայի ընկերների» հանդիպումը, որը տեղի կունենա Թունիսում: Այս խմբի մեջ մտնում են արաբական երկրների մեծամասնությունը, Թուրքիան, ԱՄՆ-ը և մի շարք եվրոպական երկրներ:
