Ըստ Սյունիքի մարզպետարանի ճանապարհաշինության և տրանսպորտի բաժնի պետ Սարիկ Աղաբեկյանի` պետբյուջեով Սյունիքի մարզային նշանակության 533 կմ ճանապարհների ձմեռային, ընթացիկ պահպանման և շահագործման նպատակով ընդամենը 102 միլիոն դրամ է հատկացվել, իսկ 2009թ. 105,239 միլիոն էր տրամադրվել: Պատասխանատուի խոսքով, այդ գումարները քիչ են, փորձը ցույց է տալիս, որ չեն բավականացնում: Բոլոր ճանապարհները պետք է բաց լինեն, հատկապես միջպետական նշանակության՝ Երևան-Մեղրի, Գորիս-Ստեփանակերտ, Անգեղակոթ-Նախիջևանի սահմանը և Կապան-Ծավ-Շվանիձոր ճանապարհները: Ս. Աղաբեկյանի խոսքով, մոտ 5 տարի է, ինչ դեպի համայնքներ տանող ճանապարհների նորոգումը չի ֆինանսավորվում, միայն պահպանման համար են տրվում: “Այս ձմեռ ավելի են խստացվել պահանջները. եթե ճանապարհները նորոգման կարիք ունեն՝ այդտեղ պահպանման աշխատանքներ չեն իրականացվելու: Դրանք նախ համայնքների բյուջեների հաշվին պետք է նորոգվեն, հասցվեն պահանջվող չափորոշիչներին, միայն այդ դեպքում արդեն անհրաժեշտ պահպանման աշխատանքներ կարվեն: Ներկայումս այդ ճանապարհների վրա պահպանման աշխատանքներ չեն տարվելու, միայն ձյունամաքրում են իրականացվելու»,- ասում է Ս. Աղաբեկյանը: Ձյունամաքրման աշխատանքները պետք է իրականացնեն մարզի չորս՝ Կապանի, Սիսիանի, Մեղրու և Գորիսի ճանշին ձեռնարկությունները, որոնց արդեն ֆինանսական հատկացումներ արվել են: Ամեն դեպքում, չնայած դժվարություններին, պատասխանատուները հավաստիացնում են, որ առատ ձյան դեպքում էլ մարզի ճանապարհները երթևեկելի են ու անցանելի են լինելու: