Սյունիքի մարզկենտրոնի բյուջեն համեստ է, հույսը դոնորներն են

Կապանի 2011թ.-ի բյուջեն եկամտային մասով կազմում է 887 մլն 238 հազ. 400 դրամ, նույնքան էլ բյուջեի ծախսային մասն է: 2010թ.-ի համեմատ 2011թ.-ի բյուջեն եկամտային մասով ավել է 5,3 տոկոսով: Բյուջեի մուտքերի մեջ սեփական եկամուտը կազմում է 37,3 տոկոս: Այն 2010-ի նկատմամբ ավել է 17 տոկոսով: 2011թ. բյուջեով ավելացել են աշխատանքի վարձատրության համար նախատեսված գումարները` 6 տոկոսով, ինչը կապված է հանրապետությունում նվազագույն աշխատավարձի բարձրացման հետ: Ավելացել է նաև սոցիալապես անապահով ընտանիքներին, հաշմանդամներին, զոհված ազատամարտիկների ընտանիքներին տրվող դրամական օգնությունների չափը` 9,5 տոկոսով: Բյուջեով նախատեսված է 10 մլն դրամ տրամադրել քաղաքապետարանին` ծառայողական մեքենայի ձեռքբերման համար, 10 մլն դրամ` վերելակների նորոգման, 4 մլն դրամ` գույքի և համակարգչային տեխնիկայի գնման, 20 մլն դրամ` խաղահրապարակների և հանգստյան գոտիների հիմնման նպատակով և այլն: Կապանի քաղաքապետ Արթուր Աթայանը 2011թ.-ի բյուջեն իրատեսական է համարում: «Իմ կարծիքով` այն ավելի համեստ է, կարծում եմ, որ դոնոր կազմակերպությունների աջակցությամբ ավելի շատ գործեր կարող ենք անել և 2011-ի վերջում կարձանագրենք, որ արել ենք ավելին, քան նշված է բյուջեում» – ասաց նա: Իսկ ինչ վերաբերում է 2010-ի բյուջեի կատարողականին, ապա ըստ քաղաքապետի` այն 94-95 տոկոս է, ինչը 2-3 տոկոսով ավել է նախորդ տարվա ցուցանիշից: Ավելացնենք, որ արդեն պայմանավորվածություն կա Լեհաստանի դեսպանատան հետ. նրանց կողմից տրամադրվելիք 16 հազար եվրոյով նորոգվելու է քաղաքի թիվ 1 մանկապարտեզի սանհանգույցը: Բացի դրանից, «Զանգեզուրի պղնձամոլիբդենային կոմբինատ» ՓԲԸ-ի աջակցությամբ կապամոնտաժվի Կապանի Վազգեն Սարգսյանի անվան մանկական զբոսայգու «Սատանայի անիվ» կոչվող կարուսելը, որը, անվտանգությունից ելնելով, չի աշխատում արդեն մի քանի տարի: Կոմբինատի արտադրամասերից մեկում ապամոնտաժված կարուսելից կպատրաստվեն փոքր չափի կարուսելներ, որոնք կտեղադրվեն քաղաքի տարբեր թաղամասերում: ԱՄՆ դեսպանատան ֆինանսական աջակցությամբ (36 մլն դրամ) բարեկարգման աշխատանքներ կկատարվեն Վահանավանքի տարածքում` այն զբոսաշրջության համար հարմարավետ դարձնելու նպատակով: