Քիչ առաջ «Առաջին լրատվական»-ին հայտնի դարձավ, որ փոխվել է հունվարի 18-ին խուլիգանություն կատարելու կասկածանքով կալանավորված Աշոտ Ավետիսյանի` «Բանգլադեշցի Համիկ»-ի խափանման միջոցը և նա ազատ է արձակվել:
Հիշեցնենք, որ Աշոտ Ավետիսյանը հունվարի 18-ին խուլիգանություն կատարելու կասկածանքով բերման էր ենթարկվել Երևանի Արաբկիրի բաժին: Ա. Ավետիսյանը նույն օրը ձերբակալվել էր և նրա նկատմամբ մեղադրանք էր առաջադրվել ՀՀ Քրեական օրենսգրքի 258 հոդվածի 3-րդ մասի 4-րդ կետի հատկանիշներով («խուլիգանություն»):
Աշոտ Ավետիսյանը հանրությանը առավել հայտնի է «Բանգլադեշցի Համիկ» մականվամբ , ով վայելում է ԲՀԿ նախագահ Գագիկ Ծառուկյանի անվերապահ աջակցությունը: Նրա հետ կապված պարբերաբար ինչ-որ միջադեպեր են լինում, բայց միշտ նրան հաջողվում է խուսափել պատժից:
2004-ի ապրիլի 5-ին ընդիմության կազմակերպած հանրահավաքի ժամանակ «Բանգլադեշցի Համիկը» և նրա ընկերները խոչընդոտել էին լրագրողների գործունեությանը և բռնություն կիրառել նրանց նկատմամբ: Այս արարքի համար «Բանգլադեշցի Համիկը» նույն տարվա հունիսին` Երևանի Կենտրոն և Նորք-Մարաշ համայնքների առաջին ատյանի դատարանի կողմից դատապարտվեց 100 հազար դրամ տուգանքի:
Հաջորդ անգամ «Բանգլադեշցի Համիկը» Հայաստանի հանրության ուշադրության կենտրոնում հայտնվեց «Տեցի կռուգ»-ում տեղի ունեցած «ռազբարկա»-ի հետ կապված: 2005-ի փետրվարի 4-ին` մի քանի հարյուր մարդու մասնակցությամբ` զինված բախման արդյունքում, հրազենային վնասվածքներից մեկ մարդ` զոհվել էր, իսկ մի քանիսը վիրավորվել:
«Բանգլադեշցի Համիկը» այս բախմանը մասնակցելու համար կալանավորված անձանց մեջ էր: Մոտ երկու ամիս անազատության մեջ անցկացնելուց հետո նա դատապարտվեց մեկուկես տարվա պայմանական ազատազրկման և ազատ արձակվեց:
