Այսօր Միացյալ Նահանգներում 55 տարեկան հասակում քաղցկեղից մահացել է տիեզերագնաց Ջենիս Վոսսը: Նա աշխարհի այն վեց կանանցից մեկն էր, ովքեր տիեզերքում եղել են 5 անգամ:
Այս մասին հայտնում է NASA տիեզերագնացության գործակալությունը: «Ջենիսը պատասխանատու էր փորձարկումների ապահովման համար, որոնք այժմ Միջազգային տիեզերագնացության կայանում (ISS) իրականացվոմ են ամեն օր»,- իր պաշտոնական հայտարարության մեջ ասել է գործակալության ստորաբաժանման ղեկավար Պեգգի Ուիթսոնը՝ հաղորդում է ITAR-TASS-ը:
1973 թ., լինելով դեռ ուսանող, Ջենիսը սկսել է աշխատել ամերիկյան տիեզերագնացության գործակալությունում: Կարճատև դադարից հետո նա NASA է վերադարձել 1977 թ.: 1990 թ. միացել է տիեզերագնացության կորպուսին և ընդհանուր անձնակազմի հետ 1993 թվականից մինչեւ 2000 թվականը 5 թռիչք կատարել դեպի տիեզերք:
2004-2007 թթ. Վոսսը NASA-ի հետազոտական կենտրոնում ղեկավարել է Kepler տիեզերական աստղադիտակի թռիչքային ծրագիրը: Վերջին տարիներին աշխատել է տիեզերագնացների վերապատրաստման վարչության ուսումնական կենտրոնում:
