Իրանի իշխանություններն ակնկալում են, որ Ղրղըզստանը թույլ չի տա ամերիկացիներին օգտագործել «Մանաս» ռազմաբազան` Իրանի դեմ հնարավոր պատերազմի ժամանակ: Այս մասին հայտարարել է Կենտրոնական Ասիայի այդ երկրում Իրանի դեսպան Մանուչեհր Մորադին:
Ինչպես հաղորդում է չինական Xinhua գործակալությունը, դեսպանը նշել է, որ «իրենք չեն կարծում, թե ամերիկացիները կօգտագործեն այդ ռազմաբազան…»: «Արևմուտքն այսօր շահագրգռված է աշխարհում կայունության ապահովման մեջ»,- ասել է դեսպանը:
Մանուչեհր Մորադին պատժամիջոցների կիրառումն ու նմանատիպ «հարձակումները» Իրանի վրա որակել է որպես հոգեբանական պատերազմ Իրանի դեմ:
«Մեր երկիրն ունի հզոր գիտատեխնիկական բազա և տեխնոլոգիաներ, հզոր բանակ: Չենք կարծում, որ որևիցե երկիր կհամարձակվի հարձակվել Իրանի վրա»,- ասել է Մորադին:
Նա նաև հույս է հայտնել, որ Հորմուզի ջրանցքը փակելու անհրաժեշտություն չի լինի, քանի որ Իրանը շահագրգռված է կայունության ապահովման գործում:
