Կապանի քաղաքապետարանի մշակույթի կենտրոնում հանդիսավորությամբ ամփոփվեց անցնող տարին: Նախ ներկայացվեցին ձեռքբերումները,ծրագրեր արվել են, բայց, ըստ քաղաքապետ Արտուր Աթայանի, կիսատ նախագծեր շատ կան: Բնականաբար, միայն տեղական բյուջեով հնարավոր չէր խնդիրները կարգավորել, ուստի քաղաքապետը շնորհակալ է բոլոր բարերարներին։ «Չեմ կարող չնշել Զանգեզուրի պղնձամոլեբդինային կոմբինատի գլխավոր տնօրեն Մաքսիմ Հակոբյանի անունը։ Կոմբինատը մեծ ներդրում է ունեցել համայնքային տարբեր ծրագրերի իրականացմանը։ Իր ներդրումն է ունեցել նաև ԱԺ պատգամավոր Վահե Հակոբյանը։ «Դինո Գոլդ Մայնինգ Քամփնին» մոտ 2 տարի է, աջակցում է համայնքում տեղի ունեցող միջոցառումներին։ Ես զգացել եմ նաև ԱԺ պատգամավոր Գագիկ Գևորգյանի անմիջական օգնությունը։ Մի խոսքով շնորհակալ եմ բոլոր բարերարներից ու գործարարներից»,-ասաց քաղաքապետ Ա. Աթայանը։ Տարվավերջին Կապանի քաղաքապետի պատվոգրի ու դրամական խրախուսման են արժանանում իրենց ոլորոտւմ աչքի ընկած կապանցիները: Աղբատար մեքենայի վարորդից մինչև բուժքույր, մանկավարժից մինչև երկրապահ ու մարզիչ: 13 հոգի արժանացան 50-հազարական դրամի: Քաղաքապետի կողմից սահմանված ամենամյա լավագույն աշխատող անվանակարգում 400 հազար դրամ պարգևի արժանացավ Կապանի կոմունալ տնտեսության պետ Վարդան Գևորգյանը։ Հետաքրքիր է, բայց փաստ, որ լրատվության ոլորտը Կապանի քաղաքային իշխանության կողմից մոռացվել էր։ Գուցե լրագրողները արժանի չէ՞ին պատվոգրերի։
