Ցավում եմ, որ ոստիկանությունն ընտրել է լրագրողի հետ միջադեպ հարթելու կալանավորման տարբերակը: «Առաջին լրատվական»-ի հետ զրույցում նման տեսակետ հայտնեց «Արմնյուզ» լրատվական հեռուստաընկերության ղեկավար, լրագրող Արտակ Ալեքսանյանը` անդրադառնալով «Հայկական ժամանակ» օրաթերթի թողարկման պատասխանատու Հայկ Գևորգյանի կալանավորմանը:
«Կարծում եմ, որ նա տաղանդավոր լրագրող է, և իրեն ճանաչում եմ շատ վաղուց: Ես դեմ եմ լրագրողի նկատմամբ ցանկացած գործողության»,- ասաց Արտակ Ալեքսանյանը` հավելելով, որ եթե «Հայկական ժամանակ» օրաթերթի խմբագրությանն աջակցության կարիք լինի, ապա «Արմնյուզ» լրատվական հեռուստաընկերությունը կքննարկի այդ հարցը: Ալեքսանյանը, սակայն, կարծում է որ Հայկ Գևորգյանը մոտ ապագայում լինելու է ազատության մեջ:
Հիշեցնենք, որ երեկ տնից դուրս գալիս կալանավորվել է «Հայկական ժամանակ» օրաթերթի թողարկման պատասխանատու Հայկ Գևորգյանը: Նա պահվում է «Նուբարաշեն» ՔՀԿ-ում:
