Ազգային վիճակագրական ծառայությունը քիչ առաջ հրապարակեց 2010 թ. հունվար-դեկտեմբեր ամիսներին սպառողական ապրանքների գների աճի վերաբերյալ տվյալները: Ըստ այդմ`տասներկուամսյա գնաճը, այսինքն` այս տարվա դեկտեմբերին գրանցված գնաճը, նախորդ տարվա դեկտեմբերի համեմատ, կազմել է 9.4 տոկոս: Սա 3.9 տոկոսային կետով գերազանցում է նպատակային միջակայքի վերին շեմը` 5.5 տոկոսը: Ընդ որում, նման բարձր տարեկան գնաճ չի եղել 1997 թվականից ի վեր: Ի դեպ, այս տարվա դեկտեմբերի պարենային ապրանքների տասներկուամսյա գնաճը, որը ավելի մեծ նշանակություն ունի սոցիալապես խոցելի խմբերի համար, շատ ավելի մեծ է եղել`15.2 տոկոս: Նշենք նաև, որ այս տարվա հունվար-դեկտեմբերի գնաճը նախորդ տարվա հունվար-դեկտեմբերի համեմատ կազմել է 8.2 տոկոս: