2011-ին Ադրբեջանը մտադիր է ղարաբաղյան հարցում ավելացնել ճնշումները միջազգային եւ տարածաշրջանային կազմակերպությունների նկատմամբ, ինչպես տեղեկացնում է Trend գործակալությունը` այս մասին հայտարարել է Ադրբեջանի նախագահի ադմինիստրացիայի հասարակական-քաղաքական հարցերով բաժնի ղեկավար Ալի Հասանովը:
«ՄԱԿ-ը չորս բանաձեւ է ընդունել հակամարտության կարգավորման վերաբերյալ, որոնք մինչ այժմ չեն կատարվել: Եթե կազմակերպությունը տարածքային ամբողջականության երաշխավոր է` նա պետք է Հայաստանի նկատմամբ ճնշում գործադրի»,- ասել է Հասանովը: Նա նաեւ հավելել է, որ Ադրբեջանը նման պահանջներ կներկայացնի ԵԱՀԿ-ին եւ միջազգային այլ կազմակերպությունների,- ասել է Ադրբեջանի նախագահի ադմինիստրացիայի հասարակական-քաղաքական հարցերով բաժնի ղեկավարը: Վերջինս նաեւ հավելել է, որ 2011-ին Ադրբեջանը կավելացնի ճնշումները նաեւ Մինսկի խմբի համանախագահող պետությունների նկատմամբ. «Կա՛մ նրանք կլուծեն այս խնդիրը` հետեւողական ճնշումներ գործադրելով կողմի վրա, որը խախտում է միջազգային իրավունքի նորմերը, կա՛մ Ադրբեջանը միջազգային նորմերին համապատասխան կօգտագործի իր ռեսուրսները տարածքների ազատման համար»,- հայտարարել է Ալի Հասանովը:
