Հայաստանի ազգային պատկերասրահում ցուցադրվում են 19-րդ դարի վերջի և 20-ի սկզբի հայ ռեալիստական արվեստի նշանավոր դեմքերից մեկի` Հմայակ Հակոբյանի (1871, Տրապիզոն-1939, Թիֆլիս) աշխատանքները:
Նրա ստեղծագործական հարուստ ժառանգությունը պատշաճ ուշադրության չի արժանացել, և հենց այդ բացը լրացնելուն է ուղղված ներկայում ներկայիս ցուցահանդեսը:
Սովորել է Թիֆլիսի Ներսիսյան դպրոցում, Մյունխենի կայսերական ակադեմիայում, ապրել և աշխատել է Գերմանիայում, Շվեյցարիայում, Թիֆլիսում, բազմիցս այցելել է Հայաստան: 1889 թվականից գեղանկարչական ու գրաֆիկական աշխատանքներով մասնակցել Թիֆլիսում ու Երևանում կազմակերպվող ցուցահանդեսներին:
Նկարել է Թիֆլիսի բազմազգ բնակչության կյանքին ու կենցաղին նվիրված թեմատիկ ու ժանրային հորինվածքներ, ազգային ու անհատական բնութագրումով առանձնացող իր մտերիմ մարդկանց և տարբեր ազգերի ներկայացուցիչների դիմանկարներ, էտյուդային բնույթի գողտրիկ բնանկարներ ու դասական հորինվածքով նատյուրմորտներ, նոր թեմաներով ու ժանրերով, գեղավեստական արտահայտչամիջոցներով հարստացրել հայ արվեստը:
Նկարչի ստեղծագործական ժառանգության գերակշռող մասը (2850 գեղանկարչական ու գրաֆիկական գործեր) պահպանվում է Ազգային պատկերասրահում:
Ցուցահանդեսի կուրատորն է արվեստաբան Քնարիկ Ավետիսյանը:
Ցուցահանդեսը բաց է մինչև փետրվարի 9-ը:
