Կառավարության գործունեության իրազեկումը նախընտրական քարոզչություն է՝ պետական միջոցների հաշվին: «Առաջին լրատվական»-ի հետ զրույցում նման տեսակետ հայտնեց իրավապաշտպան Արտակ Զեյնալյանը`անդրադառնալով կառավարության գործունեության լայնամասշտաբ լուսաբանման նոր ծրագրին: Իրավապաշտպանն իրազեկման որոշումը կապում է նախընտրական ժամանակաշրջանի հետ: Ըստ նրա` սա քարոզչության լեգալացման ձև է, որը նախորդ տարիներին անլեգալ էր իրականացվում:
«Պետական միջոցներն օգտագործվում են կուսակցության քարոզչության համար: Փաստորեն, հիմա դա պաշտոնապես է արվելու, միջոցներ են տրամադրվելու այդ «քարոզարշավի» համար: Դա վարչական և սահմանադրական գործառույթ է: Սա պետք է դիտարկել այն համատեքստում, որ կուսակցական գործիչները, ստանձնելով պաշտոններ, շարունակում են կրել իրենց կուսակցական կրծքանշանները, այսինքն` կառավարության լուսաբանման ամբողջ ընթացքում մենք տեսնելու ենք կուսակցական պատկանելիությունը ցույց տվող կրծքանշանները, որը հակաօրինական է և հակասում է Հայաստանի ստանձնած միջազգային պարտավորություններին»,- ասաց իրավապաշտպանը:
Ըստ նրա՝ նշված երկու գործոնը միասին է պետք դիտարկել: Նա նաև նշեց, որ ցանկացած պաշտոնատար անձ, ով ստանձնում է պետական պաշտոն այլևս չպետք է հանդես գա կուսակցության անունից:
Հիշեցնենք, որ նախօրեին կառավարության նիստի ժամանակ վարչապետ Տիգրան Սարգսյանն իր բացման խոսքում նշել էր, որ փետրվարի 1-ից զանգվածային լրատվական միջոցներով կառավարությունը սկսել է մի մեծ արշավ, որի նպատակն է էապես բարելավել պետության կողմից մատուցվող ծառայությունների որակը:
«Մեր քաղաքացիները պետք է իրազեկված լինեն շուրջ 18 գերատեսչությունների կողմից մատուցվող ծառայությունների վերաբերյալ, և մենք Համաշխարհային բանկի օժանդակությամբ սկսել ենք լայնածավալ իրազեկման ակցիա: Զանգվածային լրատվական միջոցները տեղեկացնելու են մեր քաղաքացիներին, թե ինչ նոր հնարավորություններ ենք նրանց համար ստեղծել, և ինչպես նրանք կարող են օգտվել այդ հնարավորություններից»,- ասել էր վարչապետը:
