Մինչև ԱԺ առաջիկա ընտրությունները «Ժառանգությունը» կշարունակի շփումներն «Ազատ դեմոկրատներ» կուսակցության և քաղաքական այլ ուժերի հետ: Այսօր կայացած մամուլի ասուլիսին այս մասին հայտարարեց «Ժառանգություն» կուսակցության ղեկավար Րաֆֆի Հովհաննիսյանը:
«Կարծում եմ, որ մենք ու «Ազատ դեմոկրատներ»-ն առանձին-առանձին ազատորեն կարող ենք մուտք գործել խորհրդարան, հետևաբար կարծիքը, որ դաշինք կազմում են յոթ տոկոսանոց շեմը հաղթահարելու համար, ճիշտ չէ: «Ժառանգություն»-ը որևէ խնդիր չունի առավել մեծ թիվ ունենալու խորհրդարանում: Սա խնդիր չէ, բայց մենք պատրաստվում ենք մեծ լուծումների: Դրա համար էլ առայժմ չեմ կարող ասել` կլինի՞ դաշինք «Ազատ դեմոկրատներ»-ի հետ, թե՞ ոչ:
Միաժամանակ, ենթադրում եմ, որ այս ընթացքում լայն օրակարգով հանդիպելու ենք բազմաթիվ կուսակցությունների, ինչու ոչ` իշխանության մաս կազմող ուժերի հետ, եթե, իհարկե, նրանք ուզում են ազատ ու արդար ընտրություններ անցկացնել»,- ասաց Հովհաննիսյանը::
Կուսակցության ղեկավարը նշեց նաև, որ նախընտրական ցուցակի հարցով քննարկումներ տեղի չեն ունեցել, չեն քննարկվել նաև մեծամասնական ցուցակին առնչվող հարցեր:
«Իհարկե, ցուցակներ կազմելու ժամանակ լինում են ճնշումներ: Ես ինքս հավակնություն չունեմ ցուցակի առաջին կամ մեկ այլ համարի: Արժանի շատ մարդիկ կան` գլխավորելու մեր ցուցակը, ես պատրաստ եմ զիջել իրենց, ես ուզում եմ` նոր սերունդ զարգանա»:
Լրագրողներից մեկի հարցին` ո՞րն է լինելու ընտրողներին գրավելու «Ժառանգության» քայլը, նա պատասխանեց. «Քաղաքացու իրավունք և պետության շահ. սրանք են այն ուղենիշները, որոնցով «Ժառանգություն»-ը պետք է ներկայանա հասարակությանը: Ինչ վերաբերում է մեր հեղինակությանը, ապա այն բազմաթիվ սլաքների ենթարկված հեղինակություն է: Բայց մենք, ուշադրություն չդարձնելով այս հանգամանքին, պետք է կենտրոնանանք մեր գործերի վրա»: