ԱՄՆ-ի նախագահ Բարաք Օբաման ԵԱՀԿ-ի Մինսկի խմբի նախկին համանախագահ Մեթյու Բրայզային նշանակել է Ադրբեջանում Միացյալ Նահանգների դեսպան: Այդ մասին հայտնում է Սպիտակ տան մամուլի ծառայությունը:
Բրայզան Ադրբեջանում ամերիկյան դիվանագիտական առաքելության ղեկավար նշանակվեց Կոնգրեսի միջնստաշրջանային ընդմիջման ժամանակ, երբ Միացյալ Նահանգների նախագահն իրավունք ունի դեսպաններ նշանակել առանց Կոնգրեսի համաձայնության:
Հիշեցնենք, որ Ադրբեջանում Միացյալ Նահանգների դեսպանի պաշտոնում Բրայզայի նշանակումը ամերիկյան Սենատում սեպտեմբերին արգելափակել էին երկու հայամետ սենատորներ` Բարբարա Բոքսերը և Ռոբերտ Մենենդեսը:
Օգտվելով այդ իրավունքից` Օբաման նաև Թուրքիայում Միացյալ Նահանգների դեսպան է նշանակել Ֆրանկ Ռիչարդոնեին, իսկ Սիրիայում` Ռոբերտ Ֆորդին:
Հիշեցնենք, որ 2006 և 2007 թթ., երբ սենատոր Մենենդեսը երկու անգամ արգելափակեց Հայաստանում ԱՄՆ-ի դեսպանի պաշտոնում առաջադրված Ռիչարդ Հոգլանդի թեկնածությունը` պնդելով, որ նա մերժողական դիրքորոշում ունի Հայոց ցեղասպանության վերաբերյալ, նախագահ Ջորջ Բուշը չօգտվեց Կոնգրեսի արձակուրդի ժամանակ նշանակում կատարելու իր իրավունքից և, ի վերջո, 2008 թ. մարտին այդ պաշտոնում առաջադրեց նոր թեկնածուի` Մարի Յովանովիչին:
