ՀՀԿ-ն կոալիցիայի ամենախոշոր մասն է և մյուսներին պարտադրում է իր տեսակետները. կընդունեն այդ տեսակետները նրանք, թե ոչ՝ «Ազատ դեմոկրատներ»-ի անդամ Ալեքսանդր Արզումանյանին քիչ է հետաքրքրում: Այս մասին նա ասաց այսօր կայացած մամուլի ասուլիսի ժամանակ:
Անդրադառնալով հատկապես ՀՅԴ-ի հետ հնարավոր համագործակցության թեմային` նա նշեց. «Մենք ընտրությունների նախաշեմին ՀՅԴ-ի հետ համագործակցելու որևէ խնդիր չունենք, բայց միասնական դաշինքն անհնար է, քանի որ «Ազատ դեմոկրատներ»-ի և ՀՅԴ-ի գաղափարախոսությունները ծայր բևեռներում են գտնվում»:
Արզումանյանի խոսքով՝ ընտրությունների նախաշեմին անկեղծ շահի պայքար է ընթանում: «Դաշտի հեգեմոնիան պահելու և վերարտադրվելու խնդիր կա: Սա նախագահական ընտրություններից առաջ ՀՀԿ-ի գլխավոր փորձն է»,- նշեց նա:
Հարցին` հնարավո՞ր է, որ ինքը ղեկավարի «Ազատ դեմոկրատներ»-ի նախընտրական շտաբը, Արզումանյանն ասաց. «Ես դժվար թե նախընտրական շտաբ ղեկավարեմ: Սակայն մենք նման լավ փորձ ունենք: Բացի այդ, «Ազատ դեմոկրատներ»-ին խորհրդարանում անպայման տեսնում եմ:
Ընդ որում, մենք խորհրդարանում շատ տեղ կվերցնենք, «Ազատ դեմոկրատներ»-ում այս առումով վիճաբանություններ չեն լինի: Մենք հարգում ենք միմյանց, լսում միմյանց կարծիքները: Իսկ ահա ՀԱԿ-ի լիդերների միջև այս հարցերի շուրջ տարաձայնություններ հնարավոր են»:
