Եգիպտոսի քաղաքական ուժերը, երիտասարդական հասարակական կազմակերպությունները, երկրի նախագահի հնարավոր թեկնածուները Ժողովրդական ժողովից (խորհրդարանի ստորին պալատ) պահանջել են անվստահություն հայտնել Քամալ Ալ-Գանզուրիի կառավարությանը՝ կապված Պորտ Սայիդ քաղաքում ֆուտբոլային խաղից հետո տեղի ունեցած անկարգությունների հետ, որոնք դաձան 73 մարդու մահվան պատճառ:
Ինչպես գրում է եգիպտական Al-Ahram թերթը, նման որոշում ընդունվել է Կահիրեում Եգիպտոսի քաղաքական ուժերի արտահերթ հանդիպումից հետո, որն անցկացվել է երկրի հնագույն լիբերալ կուսակցության՝ «Ալ Վաֆդի» ղեկավար Ալ-Սեյիդի Ալ-Բադաուիի նախագահությամբ: Նիստի մասնակիցները նաև պահանջել են Ժողովրդական ժողովից ճնշում գործադրել երկրի ռազմական ղեկավարության վրա՝ նախագահի ընտրությունների գործընթացն արագացնելու և իշխանությունը քաղաքացիական կառույցներին փոխանցելու համար:
Այսօր առավոտյան Կահիրեի «Ալ-Ահլի» ֆուտբոլային ակումբի երկրպագուները բողոքի ակցիա են կազմակերպել Եգիպտոսի մայրաքաղաքի գլխավոր հեռուստակայանի շենքի մոտ: Նրանք կառավարությունից պահանջել են անհապաղ հրաժարական տալ, ինչպես նաև բարեփոխումներ անցկացնել երկրի ՆԳՆ-ում:
Հիշեցնենք, որ Եգիպտոսի Պորտ Սայիդ քաղաքում «Ալ-Ահլի» և «Ալ-Մասրի» ֆուտբոլային ակումբների հանդիպումից հետո ծեծկռտուք է սկսվել, որի հետևանքով զոհվել է 74, վիրավորվել մինչև 300 մարդ:
Եգիպտոսի ոստիկանությունը Պորտ Սայիդում ձերբակալել է 47 մարդու, որոնք կասկածվում են անկարգություններ հրահրելու մեջ: Երկրում հայտարարվել է եռօրյա սուգ:
