«Հանա-տրանս» ընկերությունը ԼՂՀ Մաղավուզի շրջանից ածուխ կփոխադրի Վարդենիսի երկաթուղային հանգույց` հետագայում այն «Հասա գրուպ» ընկերության միջոցով` երկաթուղով կհասցվի «Երևանի ՋԷԿ»:
Այս ներդրումային ծրագրին աջակցելու համար այսօր ՀՀ կառավարության նիստում որոշում ընդունվեց «Հանս-տրանս» ընկերության կողմից 300 մլն դրամը գերազանցող ապրանքների ներմուծման դեպքում ԱԱՀ գումարների վճարման ժամկետը մինչև երեք տարի ժամկետով հետաձգելու մասին:
Էկոնոմիկայի նախարար Տիգրան Դավթյանը ներկայացրեց, որ ընկերությունը ածուխը կփոխադրի 40 ինքնաթափ ավտոմեքենաներով, ներդրումները կկազմեն մոտ 1.9 մլրդ դրամ, նախատեսվում է ստեղծել մոտ 50 աշխատատեղ:
«Այս ծրագիրն ունի ազգային անվտանգության լրջագույն կոմպոնենտ: Այս ծրագրով ամրապնդվում է մեր էներգետիկ անվտանգությունը: Կառուցվելու և շահագործման է հանձնվելու մի նոր ճանապարհ, որը կապելու է Հայաստանը Ղարաբաղի հետ, ունենալու է տնտեսական նշանակություն: Ունենալու ենք էներգետիկ հումք, որը կիջեցնի էլեկտրաէներգիայի ինքնարժեքը: Սա խթանելու է նաև տնտեսական աճին»,- հայտարարեց վարչապետ Տիգրան Սարգսյանը:
