«Տիտանիկ» նավի նվագախմբի ղեկավար Ուոլես Հարթլիի ջութակը կլինի խորտակված նավից հայտնաբերված ամենաթանկարժեք իրը, եթե դրա իսկությունը վերջնականապես հաստատվի, հաղորդում են բրիտանական ԶԼՄ-ները: Ենթադրվում է, որ հենց այդ ջութակն է եղել երաժշտի ձեռքին, երբ նա և խմբի մյուս 7 անդամները վերջին անգամ նվագեցին խորտակվող նավում:
Այդ ժամանակ ԶԼՄ-ները գրում էին, որ երբ 33-ամյա Հարթլիի մարմինը հանել են ջրից, ջութակը ամուր սեղմված է եղել կրծքին: Հայտնաբերված ջութակը պետք է ուղարկեին նրա հարազատներին, սակայն այն անհետացել էր:
Այսպիսով, գրեթե 100 տարի անց լեգենդար ջութակը դարձյալ հայտնվել է, այս անգամ Henry Aldridge & Son of Devizes աճուրդի տանը: Ջութակի ներկա սեփականատերը հայտարարել է, որ Հարթլիի մահից հետո ջութակը հայտնվել է նրա հարսնացուի՝ Մարիա Ռոբերթսոնի մոր մոտ: Եվ իրոք, ջութակի վրա գրություն կա. «Ուոլեսին մեր նշանադրության առթիվ. Մարիա»: Հենց դրանով է ամենայն հավանականությամբ բացատրվում, թե ինչու էր երաժիշտն այդքան թանկ գնահատում գործիքը:
Ջութակի իսկությունը ստուգելու համար աճուրդի տունն արդեն հազարավոր դոլարներ է ծախսել, սակայն առայժմ զերծ է մնում իր եզրակացությունները հրապարակելուց:
Ջութակը վաճառելու մասին սեփականատերը դեռ չի հայտարարել: Ամենայն հավանականությամբ այն կլինի միայն ցուցադրանմուշ:
