Եմենում զինված անձինք պատանդ են վերցրել վեց մարդու` ՄԱԿ-ի չորս աշխատակցի և նրանց ուղեկցող երկու բնակչի: Այս մասին հայտնում է Saba գործակալությունը` վկայակոչելով տեղի իշխանություններին: Միջադեպը տեղի է ունեցել հունվարի 31-ին Մահվիթ մարզում` Սանայից արևմուտք:
Մարզխորհրդի գլխավոր քարտուղար Ալի Ալ-Զիքմը նշել է, որ պատանդների թվում են մի գերմանացի և մի կոլումբացի, ինչպես նաև երկու կին` Իրաքից և Պաղեստինի ինքնավարությունից: Նրանց բաց թողնելու դիմաց առևանգողները պահանջում են Սանայի բանտից ազատել իրենց ցեղակցին:
Մահվիթի վարչության ներկայացուցիչ Ալի Ալ-Սայքամի խոսքերով՝ զինյալները հարձակվել են ՄԱԿ աշխատակիցների խմբի վրա այն ժամանակ, երբ նրանք վերադառնում էին Հարդա քաղաքում տեղակայված փախստականների ճամբարից:
Տեղի իշխանությունների վստահեցնում են, որ անվտանգության ծառայության աշխատակիցները շրջափակել են տարածքը, որտեղ գտնվում են պատանդները: Նրանց հաջողվել է կապ հաստատել առևանգողների հետ և բանակցություններ վարել:
Գերմանիայի ԱԳՆ ճգնաժամային կենտրոնը, ինպես նաև Եմենում Գերմանիայի դեսպանատունը հայտարարել են, որ փորձում են իրավիճակն ուսումնասիրել: Եմենում ՄԱԿ աշխատակիցը հաստատել է իր գործընկերների առևանգման փաստը:
Վերջին 15 տարվա ընթացքում Եմենում առևանգվել է ավելի քան 200 մարդ, որոնց մեծամասնությանը հետագայում ապահով ազատ են արձակվել:
