Քրդական Fırat լրատվական գործակալության փոխանցմամբ՝ Ալժիրում իշխող «Ժողովրդավարական ազգային միություն» կուսակցության խոսնակ Միլուդ Չորֆին անդրադարձել է Թուրքիայի վարչապետ Էրդողանի այն փորձերին, որոնք ուղղված են Ֆրանսիայի դեմ պայքարում, այսպես կոչված, «ալժիրյան ցեղասպանության» հարցին.
«Էրդողանն ու Սարկոզին նույն գաղութային ակումբից են: Ալժիրի ազատագրական պատերազմի ժամանակ թուրքերը որևէ աջակցություն չեն ցուցաբերել: Թուրքիան այժմ «ալժիրցիների ցեղասպանության» անվան տակ փորձում է առաջ տանել սեփական շահերը: Դրանով իսկ նա փորձում է շփոթմունք առաջացնել Ալժիրի բնակչության շրջանում»:
Հիշեցնենք, որ նախորդ տարվա դեկտեմբերի 22-ին Ֆրանսիայի Ազգային ժողովի կողմից Հայոց ցեղասպանության հերքումը քրեականացնող օրինագծի ընդունումից հետո Թուրքիայի վարչապետ Էրդողանը հայտարարել էր, թե Ֆրանսիան Ալժիրի գաղութացման 132 տարիներին (1830-1962) «ցեղասպանության է ենթարկել» տեղի ժողովրդին։
Այս տարվա հունվարի 9-ին Ալժիրի վարչապետ Ահմեդ Ույահյան լրագրողների հետ հարցազրույցում թուրք պաշտոնյաներին խորհուրդ էր տվել չշահարկել Ֆրանսիայի կողմից ալժիրցիների սպանության հարցը՝ ընդգծելով, որ ոչ ոք իրավունք չունի օգուտ քաղել ալժիրցիների թափած արյունից։
