WikiLeaks կայքի հիմնադիր Ջուլիան Ասանժը կհայտնվի «Սիմփսոնները» մուլտֆիլմի սերիաներից մեկում:
Ինչպես հաղորդում է Reuters գործակալությունը, Ասանժի հերոսի մասնակցությամբ էպիզոդը եթեր դուրս կգա փետրվարի 19-ին: Ըստ սյուժեի՝ Սիմփսոնների ընտանիքը տեղափոխվում է Սփրինգֆիլդից, և նոր բնակավայրում, պարզվում է, նրանց հարևանը WikiLeaks-ի հիմնադիրն է:
«Սիմփսոնների» գործադիր պրոդյուսեր Էլ Ջինը հայտնել է, որ, ընտրելով Ասանժին՝ որպես սերիալի հրավիրված աստղ, իրենք հասկանում էին, որ խոսքը «հակասական» անձնավորության մասին է: Այնուամենայնիվ, պրոդյուսերը նշել է, որ մուլտֆիլմի հեղինակները ուշադրությունը չեն կենտրոնացրել WikiLeaks-ի հիմնադրի դատական քաշքշուկների վրա և Ասանժին ներկայացրել են սատիրիկ կերպարով:
«Սիմփսոնները» (The Simpsons) հեռուստատեսության պատմության մեջ ամենաերկար անիմացոն ֆիլմն է: Բացի այդ, այն գրանցվել է Գինեսի ռեկորդների գրքում՝ որպես ամենաշատ հրավիրված աստղեր ունեցող սերիալ:
«Սիմփսոնների» առաջին մասը Fox հեռուստաընկերության եթերում ցուցադրվել է 1989 թ.:
