Թեղուտի վերաբերյալ ԵԽԽՎ հռչակագիրը Թեղուտի փրկության գործընթացի սկիզբն է: «Առաջին լրատվական»-ի հետ զրույցում նման տեսակետ հայտնեց ԱԺ «Ժառանգություն» խմբակցության պատգամավոր Ստեփան Սաֆարյանը`անդրադառնալով նախորդ շաբաթ Թեղուտի վերաբերյալ ԵԽԽՎ-ում շրջանառության մեջ դրված հռչակագրին: Նա չի բացառում, որ հռչակագիրը դառնա բանաձև և դրվի քվեարկության: Ըստ նրա` հռչակագրի հետագա ազդեցությունը կախված կլինի նրանից, թե մեր կողմից հետագայում ինչ որոշումներ և քայլեր կիրականացվեն:
Սաֆարյանի կարծիքով, սա կարևոր փաստաթուղթ է, քանի որ այն ստորագրել է 44 պատգամավոր, որոնցից միայն Զարուհի Փոստանջյանն է Հայաստանից: «Հռչակագիրը դառնում է 44 պատգամավորի քաղաքական, իրավական դիրքորոշում: Սա կարող է հրավիրել Եվրոպայի խորհրդի մարդու իրավունքների հանձնակատարի ուշադրությունը, որը կարող է անդրադառնալ այս խնդրին իր զեկույցում, նաև կարող է համապատասխան հանձնաժողովում դառնալ քննարկման առարկա, հարցը կարող է մտցվել օրակարգ և զեկուցող նշանակվել այս թեմայով»,- ասաց Ս. Սաֆարյանը: Նա նշեց, որ շատ ուրախալի կլինեինք, եթե այս քաղաքակիրթ որոշումից Հայաստանի իշխանությունները հետևություններ անեն:
Հիշեցնենք, ոչ Եվրոպայի խորհրդի խորհրդարանական վեհաժողովում (ԵԽԽՎ) «Ժառանգություն» խմբակցության ներկայացուցիչ Զարուհի Փոստանջյանը ԵԽԽՎ լիագումար նիստի ընթացքում շրջանառության մեջ դրեց գրավոր հռչակագիր:
«Թեղուտի տեխնածին բնապահպանական աղետի ծրագրի դատապարտում» վերտառությամբ քննարկման ներկայացված առաջին փաստաթուղթը, որին իրենց ստորագրություններով միացել են 27 պետություն ներկայացնող 44 պատվիրակներ, առնչվում է Հայաստանի բնապահպանական ճգնաժամին և մասնավորաբար` Թեղուտի խնդրին: Հռչակագրում նշվում է` «Մենք խստորեն դատապարտում ենք Հայաստանի կառավարության կողմից ստանձնած միջազգային պարտավորությունների շարունակական ոտնահարումը և պահանջում անվավեր ճանաչել Թեղուտի հանքի շահագործման վերաբերյալ բոլոր որոշումները»: Հռչակագիրն ամբողջությամբ կարող եք տեսնել այստեղ:
