Թունիսի ձախ կուսակցությունները և հասարակական կազմակերպություններն այսօր երկրի մայրաքաղաքում անցկացնում են «Ազատության և ժողովրդավարության պաշտպանության երթ»՝ իրենց դժգոհությունը հայտնելու հեղափոխությունից հետո սկսված ծայրահեղական կրոնական միտումների դեմ: Այս մասին հաղորդում է РИА Новости-ն՝ վկայակոչելով արաբական ԶԼՄ-ները:
Իսլամականության դեմ բողոքի ակցիայի կոչերը Թունիսում տարածվել են սոցիալական ցանցերի միջոցով: Ակցիայի կազմակերպիչները քաղաքացիներին ուղղված իրենց ուղերձում ընդգծել են, որ անթույլատրել են «սալաֆիների կողմից (ծայրահեղական իսլամիստներ.- 1in.am) ֆիզիկական ագրեսիայի աճը քաղաքացիների նկատմամբ, կրոնական ֆունդամենտալիստների կողմից թշնամանքի և բռնության տարածումը»:
Միևնույն ժամանակ Թունիսի ընդդիմադիրները դատապարտել են կառավարությանը, քանի որ վերջինս քայլեր չի ձեռնարկում այդ «վտանգավոր միտումների» դեմ:
Վերջին ամիսներին Թունիսում, որտեղ խորհրդարանական ընտրություններում հաղթեցին իսլամիստները, հաճախակի են դարձել միջադեպերը ծայրահեղ իսլամիստական ուղղության ներկայացուցիչների մասնակցությամբ: Երկրի բուհերում սալաֆիներն ուժեղացնում են ճնշումներն ուսանողների նկատմամբ՝ պահանջելով իգական սեռի ուսանողներից նիկաբ կրել (հագուստ, որը ծածկում է դեմքը և կազմվածքը): Սալաֆիները հարձակումներ են գործում լրագրողների և երիտասարդ ակտիվիստների վրա, որոնք փորձում են քննադատել թունիսյան հասարակության իսլամականացման միտումները: Բացի այդ, նրանք պահանջում են արգելել գեղարվեստական ֆիլմերի ցուցադրումը հեռուստատեսությամբ՝ դա համարելով «աստվածանարգություն»:
Նշենք, որ Թունիսը միշտ համարվել է Հյուսիսային Ամերիկայի և Մերձավոր Արևելքի ամենաաշխարհիկ և Արևմուտքին իր կենսակերպով առավել մոտ կանգնած երկրներից մեկը:
Հիշեցնենք, որ մեկ տարի առաջ Թունիսում սկսված ժողովրդական ցույցերը հանգեցրին, այսպես կոչված, «հասմիկների» հեղափոխությանը, որը արաբական մյուս երկրներում խթանեց ժողովրդական շարժումները:
