ԱՄՆ պաշտպանության նախարար Լեոն Պանետան CBS News հեռուստաալիքին տված հարցազրույցում հայտարարել է, թե համոզված է, որ Պակիստանի իշխանություններն իմացել են ահաբեկիչ Ուսամա բեն Լադենի գտնվելու վայրը դեռևս մինչև ԱՄՆ ուժերի կողմից այն բացահայտելը:
Ամերիկյան հետախուզական ծառայությունների հաշվետվության համաձայն՝ Պակիստանի զինվորական ուղղաթիռները բազմիցս թռել են այն տարածքով, որտեղ գտնվում էր Բեն Լադենի տունը:
«Անձամբ ես միշտ ենթադրել եմ, որ ինչ-որ մեկը պետք է իմանա՝ ինչ է տեղի ունենում այդ ցանկապատված տարածքում: Մի մոռացեք, որ պատերի բարձրությունը հինգուկես մետր էր»,- ասել է Պանետան:
Նրա խոսքերով՝ հենց այն մտավախության պատճառով, որ Պակիստանում ինչ-որ մեկը գիտի Բեն Լադենի գտնվելու վայրը, Վաշինգտոնը որոշել է Պակիստանի իշխանություններին տեղյակ չպահել նրա տարածքում իրականացվող հատուկ գործողության մասին: Այդուհանդերձ, Պանետան նշել է, որ ինքը, ցավոք, «ծանրակշիռ ապացույցներ» չունի:
Վաշինգտոնի և Իսլամաբադի հարաբերությունները լրջորեն վատացել են այն բանից հետո, երբ մայիսին Պակիստանի տարածքում ամերիկյան դեսանտն իրականացրեց Ուսամա բեն Լադենի ոչնչացմանն ուղղված հատուկ գործողությունները: Ահաբեկչի չեզոքացմանն ուղղված նախորդ գործողությունների ժամանակ ԱՄՆ-ը համագործակցում էր պակիստանյան կողմի հետ:
