Նախարարները եւ պատգամավորները կոռուպցիյի համար պատասխանատվության չեն ենթարկվում: Այս մասին «Առաջին լրատվական»-ի հետ զրույցում ասաց «Թրանսփարենսի ինթերնեյշնլ» հակակոռուպցիոն կազմակերպության ներկայացուցիչ Սոնա Այվազյանը`անդրադառնալով երեկ ՀՔԾ պետ Անդրանիկ Միրզոյանի հրապարակած տարեկան ամփոփիչ տվյալներին:
Սոնա Այվազյանի խոսքով` ՀՔԾ-ի ամփոփիչ զեկույցում 58 կոռուպցիոն քրգործերի թիվն ինքնին ոչինչ չի ասում: Նրա համոզմամբ` պետք է ուսումնասիրել, թե ովքեր են այն պաշտոնյաները, որոնց դեմ հարուցվել է քրեական գործ, և ինչպիսի պաշտոններ են նրանք զբաղեցնում: «Բնականաբար, գիտենք, թե որքան տարածված է կոռուպցիան, և 58 թիվը մեծ չէ: Բայց պետք է կարևորել, թե ինչ պաշտոններ են նրանք զբաղեցնում: Որպես կանոն, բարձրաստիճան պաշտոնյաները` նախարարներ և պատգամավորները պատասխանատվության չեն ենթարկվում»,- նշեց Ս. Այվազյանը:
Նա նաև ասաց, որ չեն ուսումնասիրել, թե որ բնագավառում են ամենաշատը գրանցվել կոռուպցիոն բողոքներ: Սակայն նախորդ տարիների փորձը թույլ է տալիս ենթադրել, որ ամենակոռումպացված համակարգերը ոստիկանությունն ու դատական համակարգն է:
Հիշեցնենք, որ երեկ ՀՀ հատուկ քննչական ծառայության պետ Անդրանիկ Միրզոյանը հրապարակել է իրենց գերատեսչության 2011 թվականի գործունեության տարեկան տվյալները: Ըստ այդմ, ՀՔԾ-իվարույթում քննված 193 քրեական գործից 58-ը եղել է կոռուպցիոն բնույթի, որոնցից 23-ը՝ 47 անձի նկատմամբ, դրանցից 33-ը եղել են պաշտոնատար անձիք: Դատի տրված 33 պաշտոնատար անձանցից, ըստ բնագավառների և զբաղեցրած պաշտոնների գերակշռել են ոստիկանության (16), ՊԵԿ (4) և մարզպետարանների (4) աշխատակիցները:
