Lenta.ru-ի փոխանցմամբ՝ ԵՄ-ի խոշորագույն բանկերը դադարեցրել են Իրանին սննդամթերքի մատակարարումների ֆինանսավորումը: Այս մասին հայտնում են հացահատիկի վաճառքով զբաղվող եվրոպացի առևտրականները:
Վերջիններս նշում են, որ ներկայումս իրանցիները վճարամիջոցների փնտրտուքի մեջ են: 9 խոշոր նավեր, որոնք մոտ 420.000 տոննա հացահատիկ են պարունակում, կանգնած են իրանական նավահանգիստների մոտ, սակայն վճարման հետ կապված խնդիրների պատճառով չեն կարողանում բեռնաթափվել:
Իրանը տարեկան ներկրում է մոտ 4.5 միլիոն տոննա հացահատիկ, որից 3.5 միլիոն տոննան բաժին է ընկնում եգիպտացորենին: Իրանի առանցքային մատակարարներն են Արգենտինան, Բրազիլիան և Ուկրաինան:
Հիշեցնենք, որ օրեր առաջ ԵՄ-ը որոշեց միանալ Իրանի դեմ ԱՄՆ-ի սահմանած պատժամիջոցներին, որոնցով նախատեսվում է դադարեցնել իրանական նավթի գնումը, սառեցնել Իրանի Կենտրոնական բանկի հաշիվները, ինչպես նաև հրաժարվել որևէ ֆինանսական ծառայություն մատուցելուց: Իրանական նավթի գնումից ամբողջությամբ հրաժարումը կսկսվի հուլիսի 1-ից:
