Երեքշաբթի օրը Ֆրանսիայի Սենատը 127 կողմ, 86 դեմ ձայներով հաստատեց Հայոց ցեղասպանության հերքումը քրեականացնող օրինագիծը… Այն 15 օրվա ընթացքում պետք է հաստատի նախագահ Նիկոլա Սարկոզին, որից հետո ձեռք կբերի օրենքի ուժ:
Ու մինչ Ֆրանսիայի հայկական գաղթօջախը տոնում է իր հաղթանակը, մինչ Ֆրանսիայի դեսպանատան մոտ «Ազգովի երախտապարտ» ենք ակցիա ենք կազմակերպում, ուրախանում օրինագծով, Թուրքիայի վարչապետ Ռեջեփ Էրդողան էլ շտապում է հայտարարել, որ Թուրքիան մեծ երկիր է, և այդ օրինագիծն էլ Թուրքիայի համար ուժ չունի, որևէ հայաստանցու կյանքում թե՛ օրինագծի ընդունման, թե՛ հաջորդ օրերին և թե՛ Սարկոզիի վավերացումից հետո փոփոխություն չի լինում: Ավելին` որևէ մեկը այսօր չի կարող ասել, թե ինչ կտա այն հետագայում: Պարզապես հիշեցնենք, որ բոլորովին վերջերս աշխարհահռչակ շանսոնյե Շառլ Ազնավուրը Ֆրանսիայում տպագրվող Nouvelles d’Armenie Magazine ամսագրին տրված հարցազրույցում նշել էր, որ ինքը արդեն սկսել է զզվել այս ամենից, որ երբեք չենք շահի գործը, մեր թշնամիները սպասում են, որ բոլոր նրանք, ովքեր դեռ հիշողություն ունեն, մահանան, և այսպիսով կարողանան խնդրից դուրս գալ: «Ո՞ր երկիրն է պաշտպանում հայ դատը: Ոչ մեկը: Ֆրանսիան ճանաչեց այն, ինչ պետք է ճանաչեր, ոչ ավելին: Ոչ մի երկիր մեզ ընդառաջ չի գալու, երբե՛ք: Դա ջուր է լցնում թուրքական ջրաղացին, նրանք գնալով հարստանում և էլ ավելի մեծ դիրքեր են գրավում: Նրանք արդեն «Մեծ քսանյակի» անդամ են և այլևս անգամ ջանք չեն գործադրում Եվրամիություն մուտք գործելու համար: Այս ո՞ւր ենք գնում: Եվ այդ ընթացքում Հայաստանը տառապում է. ամեն օր, օր օրի Հայաստանը դատարկվում է: Շատ չի անցնի, երբ Հայաստանը կդառնա մի դատարկ խեցի: Ո՞ւմ է դա ձեռնտու: Ընդամենը երեք մեծահարուստ ավազակի՞, երեք մաֆիոզի՞: Իսկ հարյուր հազարավոր խեղճ մարդիկ ցրված աշխարհով մեկ… Եվ այսքանից հետո ոմանք դեռ մնում են կենտրոնացած «ցեղասպանություն» բառի վրա՞, որը Թուրքիան վիճարկում է: Ես ցանկանում եմ հարցս ուղղել թուրքերին. եթե դա ցեղասպանություն չէ, ապա ինչպե՞ս կանվանեք մի ողջ ժողովրդի ոչնչացում»:
Nouvelles d’Armenie Magazine-ի գլխավոր խմբագիր Արա Թորանյանը, կարևորելով օրինագծի ընդունումը, «Առաջին լրատվական»-ի հետ զրույցում նշեց, որ նախևառաջ ֆրանսահայ գաղութի համար էր շահեկան օրինագիծը, ֆրանսահայ գաղութը պաշտպանում է այդ օրենքը, որը կարող է նախադեպ լինել ուրիշ գաղութների համար, հատկապես Ամերիկայում կարող են ավելի զգոնությամբ և հետաքրքրությամբ դիտարկել հայկական գաղութի վիճակը: Բացի այդ, Արա Թորանյանը եզրակացրեց, որ ուշադրությունը, որը ստեղծվել է օրենքի շուրջ, կարող է Հայաստանին ռեգիոնալ մեկուսացումից դուրս գալու հնարավորություն ընձեռել, քանի որ Հայաստան պետությունը Ֆրասիայի համար կարևոր է, իսկ Ֆրանսիան իր հզորությամբ չորրորդ երկիրն է աշխարհում:
Նա շտապեց ավելացնել, որ Ազնավուրը ստորագրեց և շնորհակալություն հայտնեց օրինագծի ընդուման համար: Նա նաև նշեց, որ օրինագծի ընդունումը, մեծ հաշվով, Ֆրանսիային օգուտ չի բերում, բացի խնդրից:
«Նոր Հառաջ» թերթի գլխավոր խմբագիր Ժիրայր Չոլակյանն էլ նշեց, որ բարձր տրամադրության մեջ է հայկական համայնքը, գոհ են բանաձևի քվեարկությունից, հիմա սպասում են նախագահը ստորագրի, վավերացնի օրինագիծը, որ այն ուժ ունենա:
Անդրադառնալով Շառլ Ազնավուրի` «թքած ունեմ «ցեղասպանություն» բառի վրա» արտահայտությանը, Ժիրայր Չոլակյանը նկատեց, որ այս ասելով` Շառլը չէր ուզում նվաստացնել երևույթը, ընդհակառակը, Շառլ Ազնավուրի խոսքերը հավանաբար մեծ ազդեցություն ունեցան Սակոզիի վրա հատկապես ընտրությունների նախօրյակին և այդ պատճառով ավելի աշխուժացավ օրինագծի քննարկումը: «Մասնավորապես պետք է դիտարկենք, որ ոչ թե միայն հայկական ցեղասպանության ճանաչման վրա օրինագծի վավերացումը, ընդունումը կօգնի, այլ ամբողջ միջազգային քաղաքական հեռանկարները նկատի ունենալով է այս քայլն արված, որովհետև Ֆրանսիան Թուրքիայի վարքագծի դեմ խնդիրներ ունի, Ֆրանսիայի ամբողջ ռազմավարությամբ Թուրքիան խնդիրներ ունի մարդկային ազատության, խղճի ազատության, ժողովուրդների համերաշխության հետ կապված: Թուրքական պետությունն իր ներքին հարցերին ձեռնամուխ պետք է լինի»,- ասաց Ժիրայր Չոլակյանը:
Իսկ ո՞րն է այս ամենում Հայաստանի շահը. խմբագրի խոսքերով, այստեղ Հայաստանի շահ չկա, որ քանի որ Հայաստանի շահը հայաստանցիները կորոշեն և ոչ թե ֆրանսիացիները: Ֆրանսիայի կառավարությունը շահեց, սա Ֆրանսիայի պաշտպանած օրինագիծն է: Նման տեսակետ հայտնեց Ժիրայր Չոլակյանը:
