Կենտրոն և Նորք-Մարաշ վարչական շրջանների ընդհանուր իրավասության դատարանում՝ դատավոր Մխիթար Պապոյանի նախագահությամբ, այսօր շարունակվեց ՀՀ ճանապարհային ոստիկանության նախկին պետ Մարգար Օհանյանի դեմ հարուցված քրեական գործով դատավարությունը: Սա այս գործով դատական 4-րդ նիստն էր:
Հիշեցնենք, որ ՃՈ նախկին պետը մեղադրվում է պաշտոնեական դիրքը չարաշահելու և պետական գույքի առանձնապես խոշոր չափերի հափշտակություն կատարելու մեջ: Դատական նիստի ժամանակ, ինչպես և նախորդ նիստին, հարցաքննվեցին 4 վկա՝ ՃՈ 1-ին գումարտակի առաջին վաշտի հրամանատար Յուրա Հովհաննիսյանը, 2-րդ գումարտակի 4-րդ վաշտի հրամանատար Սերյոժա Հակոբյանը, 2011 թվականի մայիս ամսվա դրությամբ 2-րդ սպայական գումարտակի 5-րդ վաշտի հրամանատարի ժամանակավոր պաշտոնակատար Կարո Կարապետյանը և Եղիշե Ենգիբարյանը:
Դատական նիստին ներկա էին նաև մեղադրող դատախազ Հարություն Հարությունյանը, ՃՈ նախկին պետ Մարգար Օհանյանը:
Հարցաքննված վկաներից 3-ի ցուցմունքներից պարզ դարձավ, որ ճանապարհային ոստիկանությունում չափանիշ է եղել ստանալ ավելի քիչ բենզին, իսկ հաշվետվության մեջ նշել ստացածից կրկնակի կամ եռակի անգամ ավելին, իսկ սա, ըստ երևույթին, համաձայնեցված է եղել գումարտակի հրամանատար Կարախանյանի հետ:
Նշենք, որ դատակոչված հինգ վկաներից մեկը չէր ներկայացել նիստին: Ըստ դատարան ուղարկված փաստաթղթերի` վկա Մերուժան Կարապետյանը տառապում է հիպերտոնիա հիվանդությամբ, բուժվում է Սպիտակի բժշկական կենտրոնում և չի կարող գալ մայրաքաղաք: Չէր ներկայացել նաև վկա Արսեն Արշակյանը:
Վկաների հարցաքննությունը դատարանը կշարունակի փետրվարի 2-ին կայանալիք դատական նիստում:
