Մարքսիստական կուսակցությունը մեծամասնական ընտրակարգով կառաջադրվի 41-րդ ընտրատարածքում. մամուլում հայտնված հրապարակումները հաստատեց Մարքսիստական կուսակցության ղեկավար Դավիթ Հակոբյանը` խոսելով նախընտրական գործընթացների և ընտրություններին իրենց մասնակցության ձևաչափերի մասին:
Գլխավոր մարքսիստն ընդգծեց, որ արդեն վճռված է՝ իր ավանդական հողում` Տավուշում, կուսակցությունը կառաջադրվի մեծամասնական ընտրակարգով: Կուսակցությունը բացառում է դաշինքները, բայց ողջունել և ողջունում է պուտինյան նախընտրական սխեման:
«Կուսակցության կադրերով չբավարարվելով՝ հաճախ դաշինքներ են կնքվում կուսակցականների և անկուսակցականների հետ: Այս կերպ կուսակցությունը օգտվում է 30 տոկոս փարթամ ազգային կադրային ռեզերվից»,-ասաց Դավիթ Հակոբյանը:
Նա լրագրողներին ներկայացրեց Մարքսիստական կուսակցության նախընտրական կարգախոսները: Առաջին պահանջը և կարգախոսը հետևյալն էր` սկզբունքորեն նոր Սահմանադրության ստեղծում` տնտեսական բլոկի առումով, քանի որ Սահմանադրության մեջ չկա տնտեսական հիմք: Հաջորդ կարգախոսը նոր ընտրական իրավունքի, սկզբունքորեն նոր պետական մեքենայի ձևավորումն է:
Մարքսիստը գործող պետական մեքենան որակեց որպես տզրուկային: Նրա խոսքով՝ պետությունը նստած է հարկահանության վրա, և հզոր կլինի այն նախագահը, ով կխոստանա բյուջեն հասցնել 10 միլիարդի և 10 տարվա ընթացքում ազգաբնակչությունը հասցնել 5 միլիոնի:
Դավիթ Հակոբյանը կարևորեց նաև նոր ազգային հայեցակարգի մշակումը, նոր դիվանագիտական դոկտրինան. «Պետք է լինի նոր կրթական դոկտրինա և անվանվի մանկավարժական հայեցակարգ: Ազգի առաջ մեկ խնդիր կա` քաղաքական և գաղափարական միասնության, նոր ընտրական իրավունքի և կուսակցական ռեֆորմի խնդիրը»,-նշեց Մարքսիստական կուսակցության առաջնորդը՝ անհրաժեշտություն համարելով կուսակցությունների գրանցումը ըստ գաղափարական հենքի:
