«Երկիր» օրաթերթի խմբագիր Բագրատ Եսայանն այնքան էլ համամիտ չէ «Լրագրողներ առանց սահմանների» միջազգային կազմակերպության զեկույցի՝ Հայաստանին վերաբերող հատվածի հետ, ուր նշվում է, որ մեր երկիրը մամուլի ազատության հարցում 2011-ին զգալի թռիչք է արձանագրել: Այս մասին նա ասաց «Առաջին լրատվական»-ի հետ զրույցում:
«Այն, որ Հայաստանը 101-րդ հորիզոնականից իջել է 77-րդ հորիզոնական, այնքան էլ մեծ թռիչք չեմ համարում: Մեր թռիչքն առաջ է ընդամենը 24 աստիճանով: Ավելի մեծ հետթռիչքներ կան: Օրինակ՝ զեկույցում ԱՄՆ-ը 27 աստիճանով հետ է մղվել: Իհարկե, չէի ասի, որ սրանից ԱՄՆ-ում խոսքի ազատությունը պակասել է»,- ասաց Բագրատ Եսայանը:
Նա նաև հիշեցրեց, որ ըստ զեկույցի՝ Հայաստանն ավելի լավ վիճակում է, քան հարևան երկրները, մասնավորապես՝ Ադրբեջանը, ուր անցած տարի նույնիսկ մի լրագրող էր սպանվել:
«Բայց եթե նայում ենք զեկույցին, ապա այնտեղ մեզ հաջորդող հարևանները Քուվեյթն ու Տոգոն են, իսկ մեզնից առաջ է Սենեգալը: Նրանք, ովքեր հպարտանում են՝ ասելով, թե խոսքի ազատության հարցում ոստյուն ենք կատարել, լավ կանեին համեմատվեին ոչ թե Ադրբեջանի, Իրանի ու Թուրքմենստանի, այլ, ասենք, Էստոնիայի հետ: Էստոնիան զեկույցում զբաղեցնում է երրորդ հորիզոնականը՝ գտնվելով խոսքի բացարձակ ազատություն վայելող երկրների շարքում: Մինչև 1991 թվականը Հայաստանն ու Էստոնիան գտնվում էին նույն երկրի կազմում, և եթե հայաստանյան իշխանություններն անցած 20 տարիներին նպատակաուղղված աշխատանք տանեին, մենք այսօր կհպարտանայինք ոչ թե 77-րդ, այլ ավելի լավ հորիզոնականներով»,- նշեց Բագրատ Եսայանը:
Ըստ «Երկիր» օրաթերթի խմբագրի՝ միջազգային կառույցների նմանօրինակ գնահատականներից ինքը ոչ շատ ոգևորվում, ոչ էլ հուսահատվում է: «Մեր կյանքի ու մամուլի վիճակը դրանից ոչ վատանում է, ոչ էլ լավանում».- ասաց Եսայանը: